Pagpang-aspalto nahunong tungod sa uwan

CEBU, Philippines - Nahunong una ang operasyon sa Talisay City Engineering Office sa ilang pagpang-aspalto sa kadalanan nga libaongon sa pipila ka barangay sa dakbayan.

Si City Engineer Gamaliel Gam nibutyag nga dili pa una nila mapadayon ang proyekto sa pagpang-aspalto sa kadalanan tungod sa bati nga panahon.

Sigun pa niya nga dili epektibo o solido ang ilang trabaho kun ilang ipugos sa pagtrabaho ang pag-ayo sa mga karsada ug basin malugaw ra ang aspalto.

Siya nagkanayon nga ila ra gyud kini nga mahuman basta mosugod na sab sa pagpakita ang haring adlaw nga magdala og kainit.

Matud ni Gam nga pipila lang una ka barangay ang ilang nagahinan og aspalto ug mao kadto ang lugar nga pwerte na gyud nga libaonga.

Dugang pa ni Gam nga aduna’y ubang karsada nga taas-taas ang ilang itrabaho ug aduna sa’y uban nga ginagmay lang apan ang maong proyekto nigahin sab kini og pipila ka milyon ka pesos. (BANAT NEWS)