Anti-Marcos rally diriyot magkatensyon

CEBU, Philippines - Bisan og nalubong na sa Libingan ng mga Bayani (LNMB) si kanhi presidente ug diktador Ferdinand Marcos padayon gihapon ang pakigbisog sa mga grupo nga supak sa maong paglubong.

Usa ka anti-Marcos rally ang gipahigayon kagahapon atol sa Bonifacio Day diin dili momenus sa usa ka libo ka tawo ang niapil nga gipasiugdahan sa Cebu  Citizens Against Marcos Burial at LNMB taliwala sa dili maayong panahon.

Singgit sa nagkalain-laing grupo nga dili usa ka bayani si Marcos ug dili gyud kini angay ilubong didto. Ilang tumong ug tinguha nga mapadangat ang ilang kasagmuyo ug sentimyento mahitungod sa nahitabo ug kang Presidente Rodrigo Duterte.

Onse ka grupo ang niapil sa kalihukan diin nitambong sab sa maong rally si Cebu City Mayor Tomas Osmeña kinsa dugay ra nga nipadayag sa iyang pagsupak mahitungod sa pagpalubong kang Marcos sa LNMB.

Si Atty. Democrito Barcenas, kinsa usa sa mga biktima sa Martial Law niingon sa iyang pangidaron karon nga 78 anyos, padayon gihapon ang pakigbisog batok sa tanang inhustisya ilabi na ang paglubong kang Marcos sa LNMB kay matud pa daku kining insulto sa 35 mil nga mga gipatay, kapin 5 mil nga gi-torture ug kapin sa 2 mil nga kalit lang nahanaw.

Mensahe sab ni Retired Judge Meinrado Paredes, kinsa usa sab ka biktima sa Martial Law ngadto sa mga millenials nga ipadayon ang pakigbisog nga ilang nasugdan.

Subay niini, gipahigayon usab ang groundbreaking ceremony sa Plaza Independencia alang sa marker sa mga Cebuano Martyrs nga nakigbatok sa diktador. Ang mga ngalan nga nabutang sa maong marker napilian pinaagi sa gimuol nga komitiba sa grupo.

Diriyot nga nitumaw ang tensiyon sa Plaza Independencia kay samtang nagpadayon ang kalihukan sa Anti-Marcos Rally niabot ang grupo nga Pro-Duterte ug nilanog ang ilang singgit nga nagsuporta sa desisyon sa presidente lakip na sa Korte Suprema.

Matud ni Atty. Ervin Estandarte, Vice President sa PDP-Laban Cebu nga aduna sila’y permit nga nakuha sa Parks and Playground sa Cebu City aron mopahigayon unta og mini-rally apan nakurat na lang sila nga nag-abot naman hinoon silang tanan.

Samtang si Akbayan Partylist Representative Tomasito Villarin kinsa supak sab sa paglubong kang Marcos sa LNMB gani kini miingon nga “Andres Bonifacio is a hero, Ferdinand Marcos was not and will never be”.

Si Cebu City Police Office director Joel Doria nihulagway nga malinawon ang mga lihok protesta sa mga nagkadaiyang grupo bisan paman nga nag-abot ang duha ka grupo. (BANAT NEWS)