Pabuto ipa-regulate sa Talisay

CEBU, Philippines - Giawhag sa konseho sa dakbayan sa Talisay ang kapolisan nga maoy mangulo sa pag- regulate sa pagpamaligya og pabuto aron malikayan ang disgrasya, ilabi na karon nga nagsingabot ang pasko.

Si Konsehal Socrates Fernandez maoy nipalabang og resolusyon nga naghangyo ni Supt. Emerson Dante tungod kay nagkaduol na ang kapaskuhan.

Matud ni Fernandez nga kun dili kontrolahon ang pagpamaligya sa mga pabuto, ang mahitabo nga bisan asa na lang unya kini ipamaligya.

Giawhag ni Fernandez ang mga barangay opisyal nga moabag sa pag-ila sa mga dapit nga adto makabaligya ug makapabuto sa mga rebentador.

Si Kapitan Raul Cabañero, presidente sa Association of Barangay Council (ABC), nipasalig sa pagsuporta sa maong kalihukan.

Gusto ni Cabañero nga adto sa dakong hawan o diha ra sa South Road Properties (SRP) ipang-display ang mga pabuto aron nga luwas sa peligro. (BANAT NEWS)