Eddiegul uyon oval ugmaron sa siyudad
CEBU, Philippines - Uyon si Talisay City Mayor Eduardo Gullas sa laraw nga himoan og track and field oval ang Talisay City Central School.
Gani matud ni Gullas nga kung mahimo sa pundo sa siyudad nga himuon nga rubberized ang oval ila kining buhaton.
Kuhaon ang pundo gikan sa Special Education Fund (SEF) sa siyudad.
Si Bise Mayor Alan Bucao nipasar og resolusyon sa paghangyo sa City Engineering Office sa paghimo og program of works sa pagtukod sa track and field oval ubos sab sa sugyot ni Kongresista Gerald Anthony “Samsam” Gullas.
Siya nagkanayon nga gihisgutan kini ni Kong. Gullas ang plano dihang nitambong sa Alay Lakad ug Halad kang Sta. Teresa de Avila niadtong Oktubre.
Asoy pa ni Bucao nga ila unang tan-awon ang lugar kung mahimo ba nila ang standard nga oval.
Apan si Mayor Gullas niingon nga ila kanang mahimoan og paagi nga mahimong standard tungod kay aduna silay mga kaila nga motabang bahin niini.
Dugang ni Gullas nga dili lang ang Talisaynong atleta ang makapahimulos unya niini kung dili lakip na ang tanang Talisaynon nga gustong mag-ehersisyo sa oval. (BANAT NEWS)
- Latest
