Arleigh nagbilin og legasiya sa mga Sugbuanon

CEBU, Philippines - Wa kapugong sa iyang emosyon si kanhi Cordova Mayor Adelino Sitoy sa dihang gipakita ang mga hulagway sa nitaliwan niyang anak nga si anhing bokal Arleigh Jay Sitoy atol sa necrological service kagahapon sa Kapitolyo.

Ang maong mga hulagway kuha sa dihang nagtrabaho pa ang bokal isip senior consultant niya sa Presidential Legislative Liaison Office didto sa Malacañang.

Ang patay’ng lawas ni Arleigh gidala sa Kapitolyo kagahapon sa kadlawon gikan sa kaulohan. 

Gisaysay ni Adelino kun giunsa nila pagkaila sa inahan ni Arleigh ug sa dihang nahimugso ang iyang bugtong anak nga lalaki.

Si Adelino nagkanayon nga bilib siya sa kalampusan ni Arleigh kun diin nakatapos kini 3 ka doctorate degree ug bisan pa man nga adunay gibati sa lawas padayon gihapon kining nagtrabaho.

Matud niya nga samot siyang nalipay dihang pareho na silang nagtrabaho sa Malacañang ug iyang gibutyag nga ang daku unta nga proyekto nga iyang ihatag sa iyang anak mao ang preparasyon sa Federalismo.

Nihatag usab og mensahe si Gobernador Hilario Davide III kinsa nagkanayon nga uwahi niyang nakit-an si Arleigh sa haya pa ni anhing bokal Teddy Ouano.

Gihulagway ni Davide nga malipayon ug komedyante si Arleigh sa una pa lang nila nga paghimamat niadtong 2009 panahon sa eleksyon. Ug sa duha ka termino niini isip provincial board member sa sixto distrito, nakita niya kun unsa kini motrabaho ug daghan ang nakabenepisyo sa iyang gipangpasar nga mga resolusyon.

Dugang sa gobernador nga nibiya niining kalibutana si Arleigh nga nagbilin og mga legasiya isip usa ka lider, iskolar ug warrior kay bisan sa iyang kondisyon, padayon kining nag-alagad sa mga Sugbuanon.

Gibutyag sa amahang Sitoy nga nanugon ang iyang anak nga magpa-cremate ug himoon kini karong Lunes.

"Nanugon sya nga magpasunog siya kay dili siya gusto nga ang wati maoy magduwa sa iyang lawas" matud ni Adelino.

Sukad kagahapon hangtud sa Sabado, naa ang haya ni Arleigh sa Presidential Chapel sa Compolitan sa may Brgy. Lahug  ug ibalhin kini sa ilang balay sa Lungsod sa Cordova.

Dugang ni Adelino nga nisaad si Presidente Rodrigo Duterte nga mobisita sa haya sa dili pa kini mogikan paingon sa Peru. (BANAT NEWS)