Labing taas nga kutay sa lechon di pa madayon

CEBU, Philippines - Nisuporta si Talisay City Mayor Eduardo Gullas sa hukom sa mayoriya sa konseho sa paghiklin una sa tinguha ni Konsehal Doroteo Emit nga makuha ang labing taas nga kutay sa lechon sa Guinness Book of World Record.

Matud ni Gullas nga ilang unahon ang kasulbaran sa mga problema nga giatubang karon sa siyudad.

Gusto sa konseho nga ipaklaro kung kinsa ug pila ang magasto sa siyudad sa plano ni Emit kinsa maoy chairman sa committee on tourism.

Matud ni Gullas nga kung mogasto og daku nga kantidad hayan adto na lang kini ihapak sa mga proyekto.

Si Emit nitug-an nga ilang kuhaon pagbalik ang dungog sa Talisay isip Lechon Capital diin adunay lamian nga inasal nga baboy pinaagi sa pagplastada sa labing taas nga kutay sa lechon baboy sa South Road Properties (SRP) atol unta sa Charter Day sa siyudad karong Enero.

Apan matud ni Emit nga iyang girespeto ang desisyon sa iyang kaubanan nga kinahanglan pa kini og dugang konsultasyon.

Si Bise Mayor Alan Bucao nitataw nga dili sila supak sa plano apan gusto lang nila nga mahan-ay ang tanan aron nindot ang mogawas nga resulta. Sa ilang kwenta nga kung 2,000 ka baboy, hayan mogasto sila og P10 milyones kun ang kagamhanan sa siyudad ang mopalit. (BANAT NEWS)