Toledo nagkinahanglan og garbage truck
CEBU, Philippines - Nagkinahanglan og dugang trak sa basura ang dakbayan sa Toledo aron makolekta ang nagkadaghan nga basura sa mga lumolupyo sa maong siyudad.
Gibutyag ni Rex Ybañez, officer-in-charge sa Public Services Division sa kagamhanan sa Toledo nga nagkuwang ang ilang garbage truck aron makolekta ang 40 ngadto sa 50 ka tonelada nga basura matag adlaw.
Matud ni Ybañez nga adunay lima ka trak ang siyudad apan tulo lang ang magamit. Gikinahanglan og 10 ngadto sa 12 ka garbage truck aron makolekta ang mga basura sa dakbayan.
Gawas sa kakuwang sa garbage truck, problema usab ang labayanan sa basura human gisirad-an ang sanitary landfill sa Barangay Don Andres Soriano.
Giawhag usab sa opisyal ang katawhan nga makig-koordinar sa barangay sa pagkolekta sa basura ingon man sa dili pagpataka og labay ug pagbilin niini sa karsada. (BANAT NEWS)
- Latest
