Fluvial sa Birhen sa Regla gidagsa og mga deboto
CEBU, Philippines - Hapsay ang dagan sa gipahigayon nga fluvial procession sa Birhen sa Regla kagahapon sa buntag diin liboan ka mga deboto ang misaksi sa maong tinuig nga kalihukan.
Matud ni Police Chief Inspector Junnel Caadlawon, chief of operations sa Lapu-Lapu City Police Office nga anaa sa 6,000 ka tawo ang misaksi sa parada sa imahe sa Birhen.
"Crowd estimate nato, together with the [niapil sa] misa, siguro mga around 6,000. Apil na ang participants sa bangka," tataw ni Caadlawon.
Bisan sa pag-abiso sa publiko nga di magpalupad og balloons samtang anaa ang presensiya sa chopper aduna gihapoy pipila ka tawo nga ilahang nakit-an nga mipalupad gihapon niini.
"Actually ato gyud silang gipahimangnoan ganiha...Di nato ka pugngan gud, kay dili nato mausab og estorya ba...pagtan-aw nato nga okay-okay na [clear skies, after flower drop], nagkadungan-dungan na ang pagpalupad sa balloons," matud ni Caadlawon.
Ang maong fluvial procession sa Birhen sa Regla gipahigayon sa alas-7 sa buntag, ug gisugdan gikan sa Pacific Cebu Resort sa Brgy. Subabasbas, ug miagi sa laing unom ka barangay hangtud naabot sa Muelle Osmeña Port sa Brgy. Poblacion.
Human niini, ang imahe gibalhin sa simbahan sa Birhen dela Regla Parish diin ang city officials usa na niini si Mayor Paz Radaza ang mipas-an sa imahe padung sa maong simbahan.
Ang pagbalhin sa imahe sa simbahan mao usab ang senyales sa pagsugod na sa siyam ka adlaw nga novena hangtud sa kapistahan niini sa Nobiyembre 20.
Mga nagkalain-laing sakop sa Navy, Coast Guard, City of Lapu-Lapu Auxiliary Force (CLAF) ug medical responders ang naka-standby alang sa pag-seguro nga luwas ug malinawon ang tibuok kalihukan. (BANAT NEWS)
- Latest
