Talisay City College gipalambo

CEBU, Philippines - Gipaspasan ang pagpanindot sa Talisay City College aron sila makakuha og nindot nga resulta sa inspeksyon sa Commission on Higher Education (CHED) sunod tuig. Si Richel Bacaltos, presidente sa YCC, nibutyag nga sa tanang kurso nga ilang gitanyag, ang hospitality management lang ang wala pa mahatagi og permanenteng government authority.

Gawas niini si Bacaltos niingon nga ila sab nga gihinay-hinayan og ayo ang mga lawak sama sa faculty, physical facilities, mini-hotel, kitchen, function room ug uban pa sa gahin nga P10 milyones.

Nanghinaut si Bacaltos nga mahatagan na gyud sila og authority sa CHED karong Pebrero samtang sa pagkakaron, ang gigamit lang una nila mao ang special permit sa hospitality management nga mapupos sab sa maong  buwan.

Ang mga kurso nga aduna nay authority mao ang Bachelor in Elementary Education, Bachelor of Secondary  Education ug ang Industrial Technology.

Paningkamutan sab nga mabalik ang dungog sa TCC nga maoy usa sa mga tunghaan nga adunay daghang mga topnotchers sa mga licensure examinations.

Nasayran nga daghang estudyante sa TCC ang nahimong topnotchers sa Licensure Examination for Teachers (LET) sa niaging tuig.

Apan nawala ang maong dungog human sa isyu sa pagdumala sa tunghaan sa niaging administrasyon diin si Bacaltos ang gihulipan ni Dr. Paulus Mariae Cañete nga maoy gitudlo ni kanhi mayor Johnny de los Reyes.

Gani kini sab ang tunghaan nga nihimo og duha ka graduation rites hinungdan sa kalibog sa mga tinun-an.

Si Bacaltos nagkanayon nga aduna silay 230 ka graduating nga tinun-an sa pagka-maestra ug gani karon pa lang sayo nilang sugdan ang pagpaubos sa review.

Dugang pa niya nga mag-practicum ang mga tinun-an sa Lunes hangtud sa Biyernes samtang Sabado ug Domingo ang igahin sa ilang review. (BANAT NEWS)