Mamatay sa sakit minusan

CEBU, Philippines - Tinguha ni Cebu City Mayor Tomas Osmeña nga mokunhod ang mangamatay sa dakbayan pinaagi sa iyang programang Long-life Medical Assistance Program diin manghatag og libre tambal sa mga masakiton.

Ang taga City Hall na mismo ang moadto sa mga pinuy-anan niadtong mga kwalipikadong residente sa dakbayan nga makabenepisyo sa programa.

Pipila ka konsehal nga sakop sa oposisyon ang nikwestiyon sa maong programa ilabi na sa mga job order employees nga maoy gitahasan nga mohatag sa mga medisina nga ang angay unta nga sa mga barangay health centers moadto.

Ang gitahasan sa paghatag sa mga tambal nga mga out-of-school youth makadawat og tag P100 matag adlaw.

Ang pangulo sa programa, Peter Neil Visitacion, niingon nga naa sa P85 milyones ang pundo sa maong programa diin ang budget nga gitagana matag benepisyaryo moabot og P3,200 matag tuig.

Sa pagkakaron niabot na sa 23,417 ka kwalipikadong indibidwal ang gihatagan sa dakbayan og libreng tambal sa hypertension, diabetes, arthritis ug uban pa.

Gipasabot ni Osmeña nga kung matag adlaw magdawatan og daily maintenance ang mga masakiton hayan ubos ang posibilidad nga sila malandig sa tambalanan ug mas motaas pa ang ilang kinabuhi. (BANAT NEWS)