Libreng stainless nga tarima gipanghatag
CEBU, Philippines - Na-turnover na kagahapon sa buntag ang stainless nga tarima ngadto sa 11 ka fish vendors sa Pasil Fish Market sa Dakbayan sa Sugbo nga programa sa Bureau of Fisheries and Aquatic Resources.
Gibutyag ni City Market Administrator Wine Miro nga ang 11 ka stainless nga tarima gibana-banang mokantidad og dul-an P200,000.
Matud niya nga daku na kini og matabang sa mga manindahay sanglit ang sagad kanila ang tarima nga gigamit ginama lang sa kahoy ug dali kining maguba kay pirme man mabasa.
Usa sa nakadawat nga si Minerva Tabalin, 50-anyos ug kapin na sa 20 ka tuig nga naninda og isda sa Pasil, nipadayag sa dakung kalipay nga nakadawat sa libre nga tarima.
Kini gumikan kay dili sila maka-afford sa pagpalit niini gumikan sa ka mahal.
Ang mga manindahay sa Phase 1 sa Pasil Fish Market gibalhin sa Phase 2 human kini gitay-og sa 7.2 magnitude nga linog niadtong tuig 2013 nga niresulta sa pagkaguba sa edipisyo.
Ang Phase 2 daghan pa og ayuhonon ug hinay-hinay na kining giatiman sa kagamhanan sa siyudad sanglit dinhi na man temporaryo nga gipahimutang ang mga manindahay. (BANAT NEWS)
- Latest
