3 tawo sa Cebu City napusilan patay

CEBU, Philippines - Tulo ka mga tawo ang napusilan patay sa managlahi nga mga insidente sa mga pagpamusil diin usa kanila ang napatay sa polis nga miresponde tungod kay nakit-an kining suway nanunggab sa ig-agaw ra pud sa suspek.

Patay ang usa ka 38 anyos nga si Teddy Batuto, taga Nivel Hills sa Brgy. Lahug ning dakbayan human napusilan ni Police Officer 1 Feleciano Yballe Jr. sakop sa Pardo Police Station.

Matud pa ni Police Officer 3 Nicolo Gonzalez, imbestigador sa Homicide Section sa Cebu City Police Office nga nahinabi sa Banat News paingon na mo-duty si Yballe dihang iyang naagian ang suspetsado nga nakakita og away sa iyang paryente nga si Otilio Bungat Jr.

Sumala pa ni Gonzalez nga si Batuto nagdala og kutsilyo samtang nagbitbit usab og tubo si Bungat.

Atol sa komosyon nakaangkon og samad dinunggaban sa ulo ug abaga si Bungat ug naatlan pag-agi ni Yballe kinsa mihunong dayon ug gibadlong si Batuto, apan matud pa sa maong polis kini na man hinuon maoy giatubang sa suspek ug giatake gamit ang kutsilyo hinungdan nga napusilan kini ni Yballe makausa sa dughan. Si Gonzalez miingon nga sa pagkakaron kasamtangan nga gikostudiya sa Pardo Police si Yballe samtang nagpadayon ang imbestigasyon.

Sa crime scene narekober sa mga polis ang kutsilyo nga dul-an napulo ka pulgada ang gitas-on nga gigamit sa suspetsado.

Samtang patay sab sa pagpamusil ang usa ka 31 anyos nga mangihaway og hayopan diha sa Brgy. Busay sa nakalabay nga gabii sa dihang kalit kining gipusil sa duha ka lalaking nagsakay og motorsiklo.

Ang biktima giila nga si Allan Ardiente Aton, nagpuyo sa maong dapit  kinsa nagpreparar na unta pag-ihaw og baboy diha kilid lang sa karsada.

Sumala pa sa mga paryente sa biktima ang backrider nga nagsuot og jacket maoy nipusil sa biktima sa makadaghang higayon. Ang imbestigador sa Homicide Section SPO2 Rommel Bancog miingon nga ilang nakuha sa crime scene ang siyam ka basiyo sa bala sa .45 caliber pistol. Dako ang pagduda ni Bancog nga wala gayo’y plano nga buhion ang biktima gumikan sa kadaghan nga samad pinusilan nga naangkon niini.

Personal nga bikil ang gitan-aw nilang motibo sa maong pagpamusil.

Sa laing bahin, lalaki nga naghantak kuyog sa iyang mga higala ang gipusil patay sa wala matino nga hinungdan sa may Sitio Silangan 2, Brgy. Tejero sayo sa kaadlawon kagahapon. Ang gipusil patay mao si Robert Uy, 28, walay trabaho ug residente sa maong lugar. Samtang ang suspetsado naila nga si Russel Mohamad alyas Joebert.

Matud pa ni Police Officer 1 Janice Tamayo sa Homicide Section sa Cebu City Police Office, nagduwa og hantak ang biktima kuyog sa mga higala dihang kalit niabot ang suspek ug gipusil sa ulo ang biktima sa wala matino nga rason ug daling nisibat.

Gidala sa Cebu City Medical Center ang biktima apan pipila ka oras, nakabsan kini sa iyang kinabuhi. Padayon pa ang imbestigasyon may kalabutan sa pagpamusil. (BANAT NEWS)