Way balloon sa fluvial parade sa Opon

CEBU, Philippines - Walay balloons nga ipalupad atol sa fluvial procession sa kapistahan sa Birhen sa Regla sa Dakbayan sa Lapu-Lapu karong Nobiyembre 12.

Mao kini ang gihangyo ni Police Chief Inspector Junnel Caadlawon, chief of operations sa Lapu-Lapu City Police Office, tungod kay nakita sa niaging fluvial procession nga dunay nangasangit nga balloon sa chopper.

“Didto lang sa Muelle Osmeña, naa tay mga nahitabo sa una nga during pag-flower drop, ang mga balloons gibuhian bitaw nya nakuan (nangasangit) sa atong chopper. So karon, amo gihangyo tong mga parokyano nga manimbahay o churchgoer nato nga ig-palupad sa atong chopper di na gyud pwede ipalupad nato kay basin madisgrasya pa hinuon ta,” matud ni Caadlawon.

Nidugang sad ang polis nga kung dungan ipalupad ang balloon ug ipanghagbong ang mga buwak gikan sa chopper, posibleng ma-disturbo ang nag-operate niini ug mabutang sa peligro ang kinabuhi.

Tumong sa polis nga luwas ang publiko atol sa ipahigayon nga fluvial procession.

Subay niini, nagkalain-laing sakop sa Air Force, Navy ug Coast Guard ang motabang sa pagseguro sa mga kalihukan sa kapistahan sa Birhen hangtud Nobiyembre 21.

Nagkanayon si Caadlawon nga heightened alert ang kapolisan sa siyudad gumikan sa gikatahong hulga sa habagatang bahin sa Probinsya sa Sugbo ug sa abiso sa US Embassy.

Nipasalig si Caadlawon nga walay hulga sa siyudad ug nagpabiling paboritong tourist destination sa mga  turista. “Sa side sa Lapu-Lapu as of the moment safe ta. Dunay mangutana nga mga turista nga how true (ang threat sa Southern Cebu) – still (under) verification, magbinantayon gihapon. Kung naay mga tawo nga dudahan, i-report nato,” dugang ni Caadlawon.

Matud ni Caadlawon nga dunay police visibility sama sa intelligence community ug SWAT ngadto sa hotels ug resort sa siyudad. (/GMR)  (BANAT NEWS)