Konseho sa Talisay manginlabot sa housing

CEBU, Philippines - Naglaraw ang konseho sa Dakbayan sa Talisay nga moapil sila sa pagsusi kun kinsa ang mga tawo nga benepisyaryo sa local housing.

Kini human si Bise Mayor Alan Bucao ang nakadawat og taho nga adunay pabor-pabor sa maong pagpili sa mga tawo nga matagaan og yuta ug panimaye.

Si Bucao niingon nga mas maayo nga moapil ang konseho sa pagsusi kun ang usa ka aplikante angayan ba gyud nga hatagan sa maong yuta ug panimaye.

Siya nibutyag nga adunay uban nga gipamaligya na sab ang yuta nga ilang naangkon samtang ang uban gipaabangan.

“It turned out nga katong mga nagkinahanglan wala na hinuon natagaan,” asoy pa ni Bucao.

Atol sa ilang regular session, iyang gitahasan si Konsehal Rodi Cabigas ug Richard Francis Aznar sa paghimo og resolusyon alang sa maong katuyuan.

Samtang si Konsehal Doroteo Emit, chairman sa committee on local housing, urban poor and rural development, niingon nga igo na nga adunay upat ka konsehal nga representante tungod kay si Mayor Eduardo Gullas man sab ang chairman sa maong komitiba.

Hinoon si Emit nitataw nga iya girespetaran ang panahum sa bise mayor ug andam kini nga mosunod og unsa ang mauyunan.

Siya nagkanayon nga mobalik sila sugod sa pag-screen sa mga aplikante hangtud na sa paghatag nila sa ilang giaplayan nga yuta ug panimaye.

Si Bucao nidugang nga sa ingon ini nga pamaagi hayan ila nang mahatag ang luna ug panimaye sa mga tawo nga klaro ug tinud-anay gyud nga walay naangkon nga yuta ug gipuy-an. (/GMR)  (BANAT NEWS)