Labella gianugnan sa ladder fire truck ug water tanker
CEBU, Philippines – Nahingangha si Cebu City Vice Mayor Edgardo Labella human masayod nga ang gipangita niyang ladder fire truck ug water tanker naa diay sa junkyard sa siyudad.
Kahinumduman nga ang pangulo sa General Services Office (GSO) nga si Ronaldo Malacora nipahibawo nga ilang nasubay ang maong mga ekipo sa junkyard sanglit guba na ug nalakip sa disposable units.
Tungod niini, magpadala og suwat si Vice Mayor Labella sa GSO lakip sa Bureau of Fire Protection aron mangayo og katin-awan kun nganong naabot sa junkyard ang maong mga ekipo.
Nasayran nga ang ladder fire truck ug water tanker gikan sa Japan ug gi-donate sa siyudad niadtong tuig 2000. Buot masayod si Labella kun nganong wala matarong og mentinar ang maong mga ekipo kay anugon kaayo kini kay wala man makagasto ang siyudad sa pagpalit niini.
Lakip sa katuyuan ni Labella mao nga kinahanglan ang tanang sakyanan sa siyudad i-mentinar gyud kay importante kini aron dili mahisama sa mga ekipo nga iyang gipapangita nga guba na.
Dugang niini nga angayan sab susihon ang report nga matud pa wala’y record ang maong mga ekipo sa property division sa GSO sanglit kumpleto man kini’g dokumento dihang gitugyan sa siyudad.
Tinguha ni Labella nga kun mahimo ipaayo ang maong mga ekipo apan siguraduhon sab nga dili makagasto og dako ang siyudad.
Hinoon si Malacora daan nang niingon nga bomba ang guba sa ladder fire truck ug water tanker ug ipasusi nila kun mahimo pa kining maayo aron mapahimuslan og balik. - /DILT) (BANAT NEWS)
- Latest
