Tawag sa pagka-santo

CEBU, Philippines - Gisaulog karong adlawa sa mga Romano Katoliko ang Adlaw sa mga Santos kon All Saint’s Day aron paghandum sa tanang santos, inila man o dili.

Daghan ang gitawag aron mahimong santos apan pipila lang ang makasanong niini.

Lisod buhaton ang maong panawagan tungod sa kamoderno na sa panahon nga nagtangag kanunay og mga tentasyon nga maoy hinungdan sa pagpakasala sa tawo.

Apan base sa mga nakasulat bahin sa kinabuhi sa mga santos,  nag-agi gyud sila og kalisod, pag-antos ug mga pagsuway.

“Every saint has a past and every sinner has a future,” sumala pa ni Oscar Wilde, usa sa mga sikat nga manunulat.

Ang maong panultihon nasilsil ug nahimong misyon sa mga relihiyosong tawo sama sa mga madre sa Augustinian Sisters of Divine Love (ASDL) nga nagbase diha sa Brgy. Mohon sa Dakbayan sa Talisay.

Ang maong pundok maoy nagpadagan o nagdumala sa Divino Amore Academy (DAA). Ilang gitudlo sa mga tinun-an nga ang matag usa kanato gitawag sa Kahitas-an aron mamahimong santos.

Duha ka adlaw sa wala pa ang bakasyon sa semestral break,  ilaha kining gipaambit sa dul-an 200 ka tinun-an sa Grade 10 sa ilang tunghaan ubos sa ilang Catholic Life Education (CLE) nga asignatura nunot sa kasaulogan sa Adlaw sa mga Santos.

Si Sister Richelle Jugao ang Vocation Directress sa ASDL ug maoy nagtudlo sa CLE niingon nga ang katuyoan sa maong kalihukan mao ang pagpasabot sa mga batan-on o ang mga gitawag nga “millennials” nga ang tanang tawo bisan asa nagagikan ug bisan unsay estado sa kinabuhi, gitawag sa pagka-santos ug kun tumanon ang gusto sa Ginoo, mahimo gyud sila nga usa ka santo.

Dugang niini, gipaningkamutan sa ilang kongregasyon nga masilsil sa ilang mga tinun-an kun unsay tinuod nga kahulugan sa kasaulogan sa mga adlaw sa mga Santos ug sa mga Kalag.

Usa na niini ang pagpaila-ila sa mga santos ngadto kanila. Tulo ka semana na ang nilabay dihang iyang gipa-research ang mga bata sa mga kasaysayan ug kinabuhi sa mga santos ug gipapili kun kinsay ilang nagustohan kanila.

Gipahimo sila og monologue nga kinahanglan sag-uhon sa atubangan sa bantawan nga gisaksihan sa mga ginikanan ug uban pang mga bisita.

Niadtong Oktubre 27, Huwebes sa niaging semana tagsa-tagsa nilang gidala ang papel sa maong mga santos, ug aron mas nindot ang pasundayag, gipasuot gyud sila sa bisti kaparehas sa gisuot niadtong mga panahon sa buhi pa ang santos nga ilang gipili.

Matag section gipilian og top three nga maayo samtang adunay duha ka nga gipili, babaye ug lalaki isip labing maayo.

Silang duha nipasundayag atubangan sa tanang tinun-an sa DAA pagkahuman sa misa sa Sto. Niño de Cebu Parish-Mohon nga gisaulog ni Fr. Jonas Mejares, OSA niadtong Biyernes sa buntag, Oktubre 28.

Sila si Sandra Bolo kinsa nipili kang Saint Rose of Lima ug Mezon Sotto nga ni-portray kang Saint Dominic Savio mao ang nahimong Best in Monologue alang sa female ug male category.

Pinaagi sa gisaysay nila sa maong pasundayag nasayran nga si Saint Rose of Lima diay mao ang labing unang santa gikan sa America kay siya taga Peru man sa South America. Naila siya gumikan sa iyang pagkamaantuson ug pagtabang sa mga nanginahanglan.

Samtang si Saint Dominic nga estudyante ni Saint John Bosco, sa edad nga 14 anyos nahimo siya nga labing bata nga santo nga dili martir. Nahimo siya’ng santo gumikan sa iyang gipakita nga "heroic virtue" sa matag adlaw ug nagpakabuhi nga balaanon.

Matud sa usa sa mga tinun-an nga si Kenn Dejacto kinsa ni-portray kang Saint Aloysious Gonzaga mas nasabtan niya karon ang mga kaagi sa mga santos.

“I learned nga not all the saints are good when they are alive but they are trying to be good for the greater glory of God. Sa akong mga batchmates nga ni-portray sa lain-lain nga saints kay happy ko kay murag gibuhi nila pagbalik ang mga balaan nga buhat sa atong mga Santos. Nanghinaot ko nga ilang puy-an ang pagkabalaan because…"Many are called but few are chosen," dugang pa ni Dejacto.

Isip ganti sa mga tinun-an, gihatagan sila og rosaryohan subay na usab sa pagsaulog sa buwan sa rosaryo matag Oktubre.

Dugang asoy ni Sister Richelle nga dili gyud angay mawagtangan og paglaum kay balaan gyud ang tawo. Ang pagka-santo usa ka maisugon nga pag-atubang sa kinabuhi samtang nahimong saksi kang Hesukristo sa paglabay sa panahon. (EIM)  (BANAT NEWS)