Kita sa CSBT nisaka

CEBU, Philippines - Muabot sa kapin P128 mil ang halin sa Cebu South Bus Terminal niadtong Oktubre 30, adlaw’ng Domingo gikan sa terminal fee.

Subay ang maong halin sa pagdagsa na sa mga pasahero nga mopauli sa ilang mga dapit sa probinsiya ug kasikbit nga mga isla alang sa kasaulogan sa Adlaw sa mga Santos ug Kalag kun diin niabot ngadto sa 850 ka mga bus ang nakabiyahe o muabot ngadto sa 38, 250 ka mga pasahero ang nakauli.

Matud ni Joey Herrera ang pangulo sa CSBT nga labing daghang pasahero nga naabot sa terminal mao niadtong Sabado sa gabii ug kagahapon sa alas 6 sa buntag. Ang maong mga pasahero niapas og uli human sa ilang mga trabaho.

Bisan pa man sa kadaghan, nagpabilin nga hapsay ang dagan sa pagpasakay sulod sa terminal sigon ni Herrera. Ilang nadawat ra nga reklamo mao ang mga nangawala sa linya.

Matud niya nga pag-abot sa mga bus, aduna ray 2 ka higayon nga kinahanglan magamit ang coaster sa Kapitolyo apan ang ubang mga bus nakabalik na dayon kini.

Kabahin sa seguridad, matud niya nga walay taho nga insedente sulod sa terminal ug nagpabilin nga malinawon bisan pa man sa pagdagsa sa mga pasahero sukad niadtong niaging semana. (/DILT)  (BANAT NEWS)