Halloween

Bisperas ron sa atong paghandum ug pagsaulog sa Adlaw sa tanang Santos ug sa pagka Nobiyembre dos ang Adlaw sa tanang  Patay. Ang halloween gikan sa pulong nga "hallow" nga nagpasabot og balaan.

Ang suffix nga "een" minugbo sa evening kon gabii. Ang buot ipasabot sa halloween, Eve of all Hallows nga saulogon sa gabii sa Oktobre 31 sa dili pa ang Adlaw sa tanang Santos sa pagka Nobiyembre uno.

Ang Nobiyembre uno nga Adlaw sa tanang Santos usa ka balaan nga adlaw alang sa mga Kristiyano. Sa Simbahang Katoliko, Anglican Communion, Methodist Church, Lutheran Church ug ubang protestanteng simbahan mosaulog sa Adlaw sa tanang Santos sa Nobiyembre uno.

Samtang ang Eastern Orthodox Church ug Eastern Catholic Church ilang saulogon ang Adlaw sa tanang Santos sa unang Domingo human sa Pentekostes. Ang Pentekostes mao ang pagkunsad sa Espirito Santo ngadto sa mga desipolo ni Kristo human siya nikayab ngato sa langit gikan sa iyang pagkabanhaw.

Ang kustombre sa halloween nagsugod didto sa Ireland ug Britanya diin ang mga kristiyano magtapok sa gabii sa kasaulogan sa All Hallows Day aron mangaliya sa Ginoo alang sa mga grasya ug proteksyon gikan sa mga dautan.

Atol sa kasaulogan dunay duwa nga himoon sa away tali sa maayo ug panuway. Ang mga magduduwa magsul-ob og costume sa mga santos ug sa mga dautang espiritu.

Matag nasud dunay iya iya nga mga tradisyon sa pagsaulog sa Todos los Santos ug sa Adlaw sa tanang patay. Sa katoliko nga mga nasud sama sa Pilipinas usa kini ka nasudnong holiday.

Naa ang trick or treat ilabi na sa mga bata. Kun kaniadto kasagaran sa ipanul-ob sa mga moapil sa trick or treat mag-anghel, demonyo, kamatayon ug ubang karakter, sa bag-ong henerasyon mga super hero na.

Sa ubang mga nasud sama sa Argentina, Austria, Belgium, Bolivia, Chile, France, Hungary, Italy, Lebanon, Peru, Portugal, Puerto Rico, Luxembourg, Malta, Slovenia, Spain ug Louisiana, maghalad og mga buwak ang mga buhi ngadto sa lubnganan sa ilang mga minatay.

Dunay pipila ka bahin sa Portugal, magdagkot og kandila sa lubong sa ilang mga minahal nga patay na. Sa pipila ka bahin sa Austria, Croatia, Finland ug mga katolikong bahin sa Germany ug ubang kanasuran sa Uropa, magdagkot og kandila ug mobisita sa lubong sa mga minatay.

Dinhi sa Pilipinas, maghikay kita sa mga paboritong putahi sa mga nangamatay ug ihalad sa altar. Sa pagka Nobiyembre dos pa kini pwede nga kan-on human sa mga kalag.

Kabahin sa pagtoo sa mga kristiyano nga sa  kasaulogan sa All Saints' Day ug All Souls' Day gikinahanglan nga iampo ang mga kalag sa tanang nangamatay ilabi na kadtong mga gikalimtan ug posibleng naa pa sa purgatoryo.

Ang mga buhi kun ang gitawag nga militant church magpa-ampo usab sa gitawag nga triumphant church kun kadtong mga kalag nga nahiluna na sa langit.