‘Task force dengue’ nilihok na

CEBU, Philippines - Nihimo na og lakang ang Task Force Kontra Lamok sa Provincial Health Office aron mapakunhod ang infection.

Si Dr. Niño Ismael Pastor, hepe sa task force, nibutyag nga ang mga sakop nga ahensiya ang gihatagan og tahas sa “search and destroy operation”.

Ang lakang resulta sa pagdeklarar og dengue outbreak ug state of calamity tungod sa dengue sa tibuok probinsiya.

Ang Department of Education, Department of Interior and Local Government, Bureau of Fire Protection, Municipal Health Officers, League of Municipalities of the Philippines, ug Provincial Social Welfare and Development Office maoy naglangkub sa task force.

Sila gitahasan sa pagpahigayon sa environmental sanitation.

Matud ni Pastor nga ang pagpuhag sa itloganan sa mga lamok maoy usa sa mga epektibong pamaagi sa pagkontrolar sa transmission sa dengue virus gikan sa lamok ngadto sa tawo.

Ang mga lokal nga kagamhanan ug publikong eskwelahan gimanduan sa pagpalapad sa pagpakatap sa impormasyon pinaagi sa pagpamutang og mga posters.

Ang LMP nipadayag og suporta ubos sa pagpahigayon og cleanliness campaign sa ilang mga lugar.

Ang mga eskwelahan gitahasan usab sa pagpanglimpiyo sa ilang school campus.

Dugang niini, si Pastor niawhag usab sa kabarangayan sa paglambigit sa kampaniya batok sa mga lamok pinaagi sa pag-mobilize sa tanang local stakeholders alang sa province-wide clean-up drive. (BANAT NEWS)