12 drivers gikiha sa Talisay

CEBU, Philippines - Gipasakaan na og kaso kagahapong adlawa ang 12 ka motorista nga nadakpan ug na-isyuhan og citation ticket apan wala nila tagda.

Si City Legal Officer, Atty. Giovanni Sususco, niingon nga kasong kalapasan sa Revised City of Talisay Traffic Code ang ilang gipasaka sa piskaliya.

Siya nagkanayon nga mao kini ang magsilbing pamaagi aron mapitol ang mga badlungon nga mga drayber. Asoy ni Sususco nga magdepende na lang kini sa piskaliya og lutsan ba dayun kini og warrant of arrest.

Siya niasoy nga kasagaran sa mga nadakpan diha sa Barangay Tabunok sa nagkalain-lain lang nga kalapasan.

Ang mga nakasuhan mao lang kadtong mga motorista nga nakalapas sa balaud sa kadalanan sa paglingkod na isip pangulo sa City of Talisay-Traffic Operation Development Authority (CT-TODA) ni retired general Hiram Benatiro.

Si Benatiro sa iyang bahin nibutyag nga makakwarta ang siyudad sa ingon niini nila nga pamaagi.

Gawas pa niini, magsilbing leksyon sab kini sa mga drayber nga mga badlungon.

Siya nagkanayon nga mahimo sab nga limpyohan dayon sa mga nakalapas sa balaud sa karsada ang ilang mga pangalan aron dili na moabot nga malutsan sila og warrant of arrest.

Dugang pa niya nga daghan pa ang mosunod nga ilang pasakaan og kaso ug daghan sab unya ang mga tawo nga modagsa sa buhatan sa City Treasurer aron mobayad sa ilang mga multa sa kalapasan nga ilang nahimo. (BANAT NEWS)