38 ka tawo naluwas

CEBU, Philippines - Mga operatiba sa National Bureau of Investigation sa Bohol uban sa nagkalainlaing social welfare and development offices, mironda sa usa ka gidudahang ilegal nga orphanage diha sa Tagbiliran City niadtong Sabado.

Si Emma Patalinghug, pangu sa Protective Services Unit sa DSWD-7, mibutyag nga 38 ka tawo ang nakuha sulod sa maong pasilidad, 31 niini mga minor de edad.

Sa listahan gikan sa DSWD-7, ang 27 niini gikan pa sa Cebu (tulo ang hamtong; 23 ang bata ug usa ang babaye); 10 usab ang gikan sa Bohol (walo ka bata; usa ka babaye; usa ka may kakulian sa pangisip); ug ang usa ang gikan sa Iligan City.

Ang mga naluwas gipaubos na kagahapon sa usa ka intake interview kauban ang mga social workers sa Social Welfare and Development Office sa Bohol.

Si Patalinghug nagkanayon nga aduna silay nadawat nga report bahin sa maong panimalay nga giingong gihimong dangpanan apan ilaha pa kini karong gihimoan og lawom nga imbestigasyon.

Apan base sa ilang pasiunang pagsubay, wala kini marehistro nga lisensyado o accredited facility (orphanage) sa DSWD-7.

“If no registration and no license to operate, then they don’t have the authority to take into custody children in need of social protection,”  matud niya.

Si Patalinghug midason nga ang nagpadagan niini nga usa ka foreigner nga naka-asawa og residente sa lugar. Matud pa nga mi-apply sila sa DSWD-7 aron mo-operate niini apan wala nipadayon pagproseso sa mga rekisitos aron sila mahatagan og lisensya. Apan ilang nasayran nga sukad niadtong 2013 nag-operate na kini.

Ang DSWD-7 nakig-alayon sa NBI-Bohol aron paghimo og imbestigasyon.

Human sa operasyon, ang mga lalaki gi-refer ngadto sa usa ka NGO-residential facility sa Bohol nga lisensyado sa DSWD. Ang mga babaye gidala sa LGU-run residential facility sa Bohol gihapon.

Matud niya nga ang mga naluwas gipasabot sa maong sitwasyon ug nganong kinahanglan silang ibalhin og laing temporary shelter.

Ang mga social workers mikuha sa profile ug family background sa mga na-rescue apil ang rason kun nganong naabot sila sa maong pasilidad. Paninguhaon sa DSWD nga makontak ang ilang mga kabanay.

Si Patalinghug miingon nga kinahanglang rehistrado ang tanang residential care facilities sa rehiyon aron sila  ma-monitor ug masigurong natabangan ba gyud ang mga gipangdala didto. (BANAT NEWS)