UN Avenue, Fernan Bridge luag na

CEBU, Philippines - Nakapaluag sa trapiko sa habig sa Dakbayan sa Lapu-Lapu ang gipatumang "no stopping zone" sa UN Avenue sa Dakbayan sa Mandaue.

Kini ang gitataw ni Mario Napule, officer-in-charge sa City Traffic Management Systems sa Dakbayan sa Lapu-Lapu.

Ang “no stopping zone” sa UN Avenue nagsugod sa niaging Martes ug ang designated area o ang "pocket lane" nga mahimong makahunong ang pangpublikong sakyanan anaa nahimutang sa may Phoenix Gasoline Station ug sa terminal sa Pacific Mall. Apan ang gikatakdang pag-ayo sa UN Avenue ang sunod gikabalak-an nga makapahuot sa dagan sa trapiko.

Matud ni Napule nga sa pagkakaron wala pay koordinasyon sa duha ka siyudad.

Kagahapong adlawa nagsugod ang road repair sa UN Avenue matud ni Glenn Antigua, chief of operations sa Traffic Enforcement Agency of Mandaue.

Matud ni Antigua nga nisaad ang Department of Public Works and Highways nga mahuman ang proyekto sa dili pa magsugod ang piyesta sa Dakbayan sa Lapu-Lapu sunod buwan.

Sa habig ni Napule, padayon lang sila sa pag-monitor sa dagan sa trapiko samtang nagpaabot sa abiso gikan sa Siyudad sa Mandaue.

Samtang mokabat sa 100 ka sakyanan ang gipangdakop sa mga traffic enforcers sa unang adlaw nga pagpatuman sa “no stopping zone” sa UN Avenue.

Kadaghanan sa mga drayber nga nadakpan nakalitan sa pagpanakop ug bisan gani ang sumasakay ang lakip sa nireklamo tungod kay nakahatag kini kanila og kahasol.

Ilang reklamo ang kakuwang sa pagpahibawo ngadto sa publiko nga nagpaabot sila sa naandan nga lugar apan sayluhan na lang sila sa mga sakyanan.

Apan si Antigua niingon nga dugay na kaayo ang “no stopping zone” sa UN Avenue ug walay loading ug unloading area.

Gitataw niya nga karon lang gihugtan ang pagpatuman niini tungod kay gikinahanglan na gyud nga maluag ang dagan sa trapiko.

“No jaywalking zone” sab ang maong lugar diin gidili ang mga tawo nga molabang.

Si Antigua niingon nga ang ilang gihimo nga pagpatuman sa “no stopping zone” nakapaluag gyud sa mga sakyanan. (BANAT NEWS)