Accounting gikuwestiyon ni Labella

CEBU, Philippines - Gikuwestiyon ni Cebu City Vice Mayor Edgardo Labella ang Accounting Office sa dakbayan kay giingong nganong kinahanglan pa sa mga barangay official nga mohatag og promissory note aron makabayad sa incentives nga gihatagan ngadto kanila sa niaging tuig.

 “Thus, we beg to question why the City Accounting Office would necessitate the submission of a document in order to issue a certificate of estimates of income when it is the City Treasurer’s Office which is primarily tasked with such responsibility under the Local Government Code,” tipik sa suwat ni Labella nga gipetsahan og Oktubre 13 ug gipadala ngadto kang City Accounting Office, OIC Arlene Rentuza ug kang City Treasurer’s Office, OIC Tessie Camarillo.

Gipahimug-atan sa suwat ni Labella nga ang notice of disallowance gi-apelar pa sa Commission on Audit (COA) ug hangtud karon wala pa kini tubag.

Gumikan niini, niapelar si Labella sa pag-ingon nga ang certificate of estimates of income i-release subay sa hangyo sa barangay officials nga walay kondisyon nga nahasubay sa mandato sa LGC. Ang maong lakang nahimo dihang nagpatabang sa bise mayor ang pipila ka mga barangay officials.

Suway nga gitawagan sa The FREEMAN si Rentuza apan wala pa siya’y tubag bahin niini. Samtang si Camarillo, dili pa makakomento kay wala pa niya mabasa ang maong suwat.

Una nang nipadala og notice of disallowance ang COA ngadto sa siyudad nga dili angayang hatagan og incentives ang mga barangay officials nga niabot ang kantidad og kapin P21 milyones

Kahinumduman nga sa niaging tuig, ang kagamhanan sa siyudad nanghatag og tag P45 mil ngadto sa 80 ka barangay kapitan, P27 mil sa matag 560 ka barangay konsehal ug tag P18 mil ang 80 ka barangay secretaries ug barangay treasurers isip incentives. Gikan sa report sa The Freeman (BANAT NEWS)