Epileptic nabiktima sa hit and run
CEBU, Philippines - Dead on arrival sa Barili District Hospital ang usa ka 18 anyos nga lalaki human kini nadasmagan sa wala matino nga sakyanan ug gibiyaan sa national highway habig sa Barangay Tangil sa Lungsod sa Dumanjug, pasado alas 10 sa nakalabay nga gabii.
Ang biktima giila sa mga otoridad nga si Clare Patenio, ulitawo ug nagpuyo sa maong dapit. Ang desk officer sa Dumanjug Police Station nga si PO3 Ian Joseph Arapoc niingon nga mingaw ug ngitngit ang lugar kun diin nadasmagan ang biktima.
Nadawat sa kapolisan ang alarma human adunay usa ka barangay tanod ang nanawag kanila dihang nakita ang lawas sa biktima nga nagbuy-od sa nahisgutang lugar.
Sulay pa unta kini nga gidala sa tambalanan apan nakabsan gyud kini sa kinabuhi.
Matud ni Arapoc nga adunay sakit nga epilepsy ang biktima ug kanunay lang kining atakihon sa iyang sakit samtang maglakaw-lakaw.
Usa sa pagduda ni Arapoc nga posibling giataki sa kalsada ang biktima ug samtang kini natumba sa dalan naligsan kini sa sakyanan, apan posible sab nga kini nadasmagan samtang naglakaw.
Adunay nakuha nga impormasyon ang mga polis nga usa ka itom nga kotse ang nakaligis sa biktima ug ila kining gisubay karon.
Usa sa gisusi sa mga polis kun aduna ba’y close circuit television o CCTV duol sa dapit aron makita ang sakyanan nga nakadasmag sa biktima. (BANAT NEWS)
- Latest
