Padala

Wa man gihapon Mir muabot imong gipadala, teks gikan ni Gina sa Nashville, U.S.A. nga nabasa ni Mira sa iyang selpon samtang nagtan-aw siya og  TV. Nisurok ang dugo ni Mira ning sayong kahaponon. Hapit duha ka bulan na ang nakalabay.

Si Julie nga kanhi silingan nila sa lungsod sa Amiraw habagatang Sugbo tua na nagpuyo sa Kansas, U.S.A. Kinaiya sa mga Pilipino nga magtinabangay kun tua sa laing nasud. Si Gina ang unang naka-abroad. Napulo ka tuig na siya didto kay nakabana og Amerikano. Nadawat nga teller sa usa ka banko sa Nashville. Accountant si Julie sa usa ka dakong department store sa Kansas. Wa siya maglisod og abroad kay retired US Army iyang papa.

Bisa'g silingan sila, layo og gintang ang ilang estado. Ang pamilya ni Julie giilang tubigtubigan sa ilang lungsod. Ang pamilya ni Gina, kabus kay drayber lang og ambulansiya iyang amahan. Apan tungod kay silingan, magkaduwaduwa sila ug magkasandurot.

Sa nia pa sa Pilipinas si Julie, kada uli ni Gina gikan sa Amerika, duna gyuy sinugatan si Julie, kasagaran alahas ug mahalon nga pahumot. Gihatagan ni Gina og importansiya  ilang panaghigala. Apan sukad nga niasenso si Gina, nakapakonkreto ug nakapanindot sa balay sa iyang ginikanan, nauga ang tinagdan ni Julie. Pero bisan pa niana nakigtsikatsika gihapon si Gina ni Julie sa Facebook. Dihang nasayod siyang mobakasyon sa Pilipinas si Julie sa bulan sa Hunyo nihangyo si Gina nga magpadala og package gikan sa Pilipinas. Kay gihidlaw na siya'g buwad nga nukos ug danggit.

Si Mira ang namalit sa buwad sa pamalihug ni Gina.Ang sabot nila ni Gina ug Julie nga inig balik ni Julie sa Kansas sa bulan sa Hulyo, ipadala ang package pinaagi sa Post Office.Nisaad si Gina nga ulian si Julie sa bili sa stamps.

"Ayaw na lang paglaum nga muabot pa to sa gidugayon kun napadala man, giagup-opan nato. Magpalit ko'g laing buwad ug ipadala nako sa private courier. Ayaw na gyud paghasol og laing tawo," ni Mira sa iyang teks ngadto sa manghod, nagpangusmo, nagpamente. (Kataposan)