Linog 2013 naghatag og leksiyon

CEBU, Philippines - Takdo tulo na ka tuig karong adlawa human sa pag-igo sa 7.2 magnitude nga linog sa Sugbo ug sa   Bohol nga niguba sa mga karaang simbahan ug ubang establisemento.

Ang maong hitabo naghatag og leksiyon ilabi na sa kagamhanan sa Siyudad sa Sugbo.

Matud ni Nagiel Bañacia, pangulo sa City Disaster Risk Reduction and Management Office, nga itandi sa 2013 ug karon, ang dakbayan mas daghan na og mga nahimong pagpangandam aron pagtubag sa mga katalagman sama sa linog.

Gawas sa mga trainings, kompleto na sab ang ilang mga ekipo.

Iyang giangkon nga human sa insidente, nakita gyud niya ang pagkuwang kaniadto sa mga responders kung unsaon pag-manage sa mga tawo atol ug human sa hitabo. Samtang si Konsehal Dave Tumulak padayon nga nag-awhag sa katawhan nga magmabinantayon, disaster resilient ug palig-onon ang kabalayan ug moumol og kaugalingong emergency plan.

Sa gihimong hazard mapping simulations, moabot sa 32 ka buildings sa downtown area ang giila nga delikadong mahugno kun duna pay mas kusog nga linog nga moigo.

Matud ni Tumulak nga nagpadayon ang retrofitting sa maong mga buildings nga natukod niadto pang 1992 diin wala pa napasar ang Building Code.

Sa laing bahin, lima ka parokya nga apektado sa linog ang hingpit na nga gi-turnover sa National Historical Commission of the Philippines ngadto sa Archdiocese of Cebu.

Kini mao ang Basilica Minore del Sto. Niño, Sto. Tomas de Villanueva Parish-Pardo, San Miguel Archangel Parish-Argao, St. Michael the Archangel Parish-Samboan ug St. Francis of Assisi Parish-Dumanjug.

Matud ni Fr. Brian Brigoli, pangulo sa Archdiocesan Committee on Cultural Heritage sa Archdiocese of Cebu, nga gawas sa maong mga parokya, aduna pay pipila ang padayon pa nga gitrabaho ug gilauman nga sa Nobiyembre matunol na kini sa Diocese nga naglangkub sa Campo Santo sa Cathedral Carreta Cemetery, San Guillermo de Aquitana Church-Dalaguete ug Nuestra Señora del Pilar Church-Sibonga.

Gitug-an ni Brigoli nga 95 porsiyento na sab ang trabaho sa NHCP sa mga restoration sa pipe organ ug ceiling painting sa mga parokya nga naglangkub sa St. Catherine of Alexandria Church-Carcar City ug Nuestra Señora de Patrocinio Parish-Boljoon.

Dugang ni Brigoli nga ang gobiyerno pinaagi sa NHCP maoy nag-budget alang sa kaayuhan sa mga parokya ug bugtong sila sa commission maoy nag-supervise sa trabaho ug sa implementasyon niini.

Obligasyon na sa mga nagdumala sa parokya ang pagmintenar sa maong mga simbahan.

Gipahibawo ni Brigoli nga bisan og wala nalakip ang Bantayan Island sa linog apan padayon gihapon karon ang trabaho niini human kini naapektuhan sa nilabay nga bagyong Yolanda. Sayo karong buntaga, bagtingon og pipila ka minutos ang kampanaryo sa Basilica Minore de Sto. Niño agi og pagtimaan sa nilabay nga linog. Decemay P. Padilla ug Rowena D. Capistrano (BANAT NEWS)