Upat sikop sa buy-bust, nisurender apan nibalik

CEBU, Philippines - Nasikop sa managlahing buy-bust operation sa Dakbayan sa Lapu-Lapu sulod sa duha ka adlaw ang duha ka tawo.

Unang nasikop ala una sa kadlawon sa niaging Domingo si Jeniel Ongco Palacio, 35, sa Sitio Ibabao, Barangay Pusok.

Matud ni Police Chief Inspector Wayne Magbanua, hepe sa Pusok Police Station, nga nisuway si Palacio sa pagsukol sa mga polis apan dali kini siyang nakontrolar.

Nakuha gikan kang Palacio, kinsa lumad nga taga Natobga, Kanangga, Leyte, ang pinutos nga shabu nga gibana-banang mokantidad og P179, 360.

Sa niaging semana, laing 22-anyos nga lalaki ang gisikop sa Sitio Ikasog, Barangay Marigondon.

Gitumbok sa polis si Elmer Gohol Sarmiento sa alas 9:30 sa gabii sa maong dapit, matud ni Police Chief Inspector Jimmy Fortes sa Marigondon Police Station.

Nakuha gikan kang Sarmiento ang mga pinaketeng shabu nga balor og P5, 200.

Samtang nasikop ang duha ka gidudahang pusher og shabu nga nitahan na sa Oplan Tukhang sa kapolisan sa Lungsod sa Liloan sa niaging gabii.

Si Police Officer 3 Jayson Gayo sa Liloan Police Station niila sa duha nga sila  si Jayson Tauto, 32, taga Barangay Yati, ug Angelito Pepito, 40-anyos.

Giingong nibalik sa ilegal nga kalihukan ang mga suspek hinungdan nga gipahigayon ang buy-bust operation nga gipangulohan ni Chief Inspector Franco Rudolf Oriol, hepe sa kapolisan sa lungsod.

Si Tauto ug Pepito nasakmitan og shabu balor og P20,000.   (BANAT NEWS)