Pulis napusilan tabangan, pasidunggan
CEBU, Philippines - Hatagan og pasidungog ingon man tabang pinansyal sa Police Regional Office-7 ang polis nga napusilan sa duha ka tulisan human kini niresponde sa komosyon sa iyang paglabay sa nahitaboan.
Nalandig sa tambalanan si Police Officer 1 Erwin Pepito nga nadestino sa Borbon Police Station kinsa nakaangkon og samad pinusilan sa nagkadaiyang bahin sa iyang lawas.
Si Pepito paingon unta mo-check-in sa Hidden Lodge dihang iyang naaktuhan ang duha ka tulisan nga nanulis sa maong establesemento.
Matud ni PRO-7 director, Chief Supt. Noli Taliño, nga iyang hatagan sa saktong pasidungog ang maong polis alang sab sa pagpasalamat sa iyang gihimo lakip ang pinansyal nga tabang.
Ang duha ka tulisan nga sila si Mark Tampus, 30, ug Rex Braga, 25, ang nadakpan sa kapolisan atol sa follow-up operation sa mga sakop sa Mandaue City Police Office ug si Braga ang napusilan sa iyang bukton dihang nisukol sa kapolisan.
Ang duha positibong giila nga maoy nitulis sa larangan sa Lungsod sa Consolacion ug nilugos sa duha ka katabang human kini gidala sa sementeryo sa Barangay Tayud. (BANAT NEWS)
- Latest
