Health board gitukod ni Davide

CEBU, Philippines - Gitukod ni Gobernador Hilario Davide III pinaagi sa Executive Order No. 11 ang Provincial Health Board alang sa ikaduha niyang termino hangtud sa 2019.

Ang PHB langkuban sa gobernador isip chairman ug ang vice chairman mao ang officer-in-charge sa Provincial Health Office nga si Dr. Rene Catan.

Ang mga sakop gilangkuban nila ni Bokal Christopher Baricuatro, chairman sa committee on health sa Provincial Board; representante gikan sa pribadong sektor o non-government organization (NGO) nga nalambigit sa health services ug representante sa Department of Health (DOH).

Ang PHB ang morekomendar ngadto sa PB sa mga ipatuman nga programa sa panglawas sa probinsiya ingon man sa budget sa operation ug maintenance sa health facilities ug services sa probinsiya subay usab sa administrative standards sa DOH.

Ubos sa PHB adunay mga komitiba nga mag-advise kabahin sa pagpili og personnel ug promotion, bids and awards, grievances and complaints, personnel discipline, budget review ug operations review.

Ang chairman, vice chairman ug mga miyembro sa PHB walay dugang sweldong madawat apan ang mga miyembro kinsa dili mga opisyal o kawani sa gobiyerno adunay travelling allowance nga kuhaon sa pundo sa PHB.  (BANAT NEWS)