Nahugno nga construction gipahunong sa labangon

CEBU, Philippines - Nipagawas dayon og Notice of Suspension ug Notice of Illegal Construction ang Office of the Building Officials (OBO) sa Dakbayan sa Sugbo human sa digrasya niadtong Miyerkules nga nikalas sa kinabuhi sa usa ka welder sa dalan Salvador Extension,  Labangon.

Gipasabot ni Engr. Josefa Ylanan, pangulo sa OBO, nga automatic gyud dayon ang notisya gumikan sa kalapasan nga nahimo sa Cebu Landmaster nga maoy developer ug J.E Abraham C. Lee Construction and Development Inc. nga maoy kontraktor sa Casamira Towers. Sa ilang pakisusi sa lugar ilang nasuta nga dunay excavation sa pundasyon nga walay labot sa permit nga gi-isyu sa siyudad.

Gipa-verify kini sa OBO ug nahibaw-an nga ang permit nga gi-isyu sa siyudad niadtong Hulyo alang lang sa demolition sa usa ka bodega sa dapit ug wala silay kasayuran nga nagpadayon ang pagkawot og yuta sa lugar.

Gilawmon sa excavation dul-an na sa 6-metros ug nakita sab sa mga inspectors nga ang sheet pile nga nagpugong sa paril nalusno. Sigun sa OBO nga nakalapas ang kontraktor lakip na ang developer kay wala man sila nakakuha og excavation permit. Ang Department of Labor and Employment-7 sa ilang bahin niasoy nga daghan sila og nakitang kalapasan sa construction site atol sa gihimong pagsusi.

Matud ni DOLE-7 Director Exequiel Sarcauga nga walay safety engineer, walay construction safety and health program, walay napakita nga certificate gikan sa TESDA ang operator sa backhoe ug wala usab kini ma-testing.

Gawas niini wala usab makapakita ang kadagkuan sa construction site sa ilang design ug dili usab kompleto ang ilang Personal Protective Equipment (PPE). Ang ahensiya nipagawas og cease and desist order ug magpabilin kini hangtud nga makorehian sa kontraktor ug developer ang mga kalapasan.

Atol sa mandatory conference, susihon sa DOLE-7 kung nganong nakasugod sa ilang proyekto ang kontraktor ug developer bisan kuwang ang mga rekisitos.  (BANAT NEWS)