‘Mahuyang’ nanuburno, babayeng pusher sikop

CEBU, Philippines - Gipaslak sa selda sa Fuente Police Station sa Cebu City Police Office ang usa ka mahuyang nga nadakpan sa entrapment operation human suway nga nisuhol sa mga polis aron buhian ang iyang igsuon gumikan sa kaso sa drugas.

Ang mahuyang giila nga si Jeffrey dela Peña, 29, taga Lower Pailob, Sambag 2, Dakbayan sa Sugbo.

Si Jeffrey giingong nisuway og hangyo sa mga polis nga buhian ang iyang igsuon bugti sa P15,000.

Apan human gitunol sa suspek ug nadawat ni PO2 Ulysses Reales ang kwarta, gipusasan sa mga polis ang mahuyang.

Tukmang kaso ang atubangon sa dinakpan nga gibalhug sa selda sa kapolisan kuyog ang iyang igsuon.

Samtang gitang-gong sa detention cell sa Presinto 1 sa Mandaue City  Police Office ang usa ka babaye nga biktima sa sunog nga temporaryo nga nagpuyo sa Cebu International Convention Center kinsa nagpadayon sa pagpayuhot sa ilegal nga drugas.

Si Senior Police Officer 1 David Omambac niila sa nadakpan nga si Leonidas Francisco Soco, 50, taga Barangay Guizo sa maong dakbayan.

Ang dinakpan usa sa gatusan ka drug pushers ug users nga nitahan   ubos sa Oplan Tukhang apan nagpadayon sa ilegal nga kalihukan bisan sa saad ug pirma nga moundang na.

Usa ka buy-bust operation ang gipahigayon hinungdan sa pagkasikop sa suspek.  (BANAT NEWS)