Peter Lim: inosente ko

CEBU, Philippines - Sugboanong negos-yante nga si Peter Lim masaligon nga malimpyohan ra iyang pangalan ug dili siya ang Peter Lim nga sakop sa Visayas drug ring sa negosyo sa ilegal nga drugas.

Kini mao ang iyang gibutyag sa The Freeman, igsuong pamantalaan sa Banat News nga ekslusibo niyang gikahinabi sa usa sa mga hotel dinhi sa Sugbo kagabii.

Si Lim inubanan sa iyang usa ka sinaligan ug duha ka mga anak samtang nagpa-interbyu nagdumili pagtugot pagdala og recorder apan nitugot siya nga magpakuha og hulagway.

Matud pa niya, nagsugod kining tanan dihang gilambigit ang iyang pangalan niadtong 1997 privilege speech ni Senador Vicente Sotto nga nag-ingon usa ka Barry Luk alyas Peter Lim ang nagpasulod og ilegal nga drugas dinhi sa nasud.

Niadtong 2001 Congressional Inquiry nga gipatawag ni kanhi kongresista Antonio Cuenco subli siyang gipasanginlan kauban ang iyang igsuong si Wellington Lim tungod gihapon sa ilegal nga drugas.

Matud pa niya wala gyud siya sa listahan sa kongresista sa mga giingong mga drug lords apan nahibulong siya nganong giapil siya.

Matud pa niya andam siyang mopresentar og mga kamatuoran uban sa mga news clippings nga nagpamatuod nga dili siya mao ang gipasabot sa “Peter Lim” nga gilambigit sa negosyo sa illegal drugs.

Karong semanaha gikatakda siyang moadto sa buhatan sa National Bureau of Investigation didto sa kaulohan aron ipresentar ang mga materyales ug mopaubos sa imbestigasyon.

Kahinumdoman nga personal nga nagkita sila si Lim ug si Presidente Rodrigo Duterte didto sa Davao City niadtong miaging semana ug didto gibaharan siya nga “patyon” kun mapamatud-an sa imbestigasyon nga nalambigit siya sa ilegal nga drugas.

Si Lim nagkanayon nga tungod niini, daghan siyang nadawat nga mga death threats gikan sa tawag sa telepono ug suwat diha sa iyang opisina.

Iya usab gibutyag nga kataposan siyang migawas sa nasud kauban iyang pamilya niadtong nakalabay nga Mahal nga Adlaw.

Matud pa niya, apektado na kaayo ang iyang pamilya sa mga nahitabo kaniya ug miawhag sa publiko ug sa mga netizens nga di sila magpalabi og akusar kaniya.

Masaligon siyang malimpyohan ra iyang pangalan basta dili lang sagolan og ‘binuang’ ang imbestigasyon.

Samtang iyaha usab giklaro nga walay tawong nalambigit sa ilegal nga drugas ang magpatugatuga og pagpakuha og picture kauban si Duterte.

Kini human nigawas sa mga balita ang hulagway nga nagpa-picture silang duha kauban sa pangulo atol sa usa ka kasal dinhi sa Sugbo. (BANAT NEWS)