Mga hepe sa Cebu girelibohan

CEBU, Philippines - Ang mga direktor sa kapolisan sa dakbayan sa Sugbo, Mandaue ug Lapu-Lapu ingon man ang direktor sa Cebu Provincial Police      Office (CPPO), giparelibohan sa Campo Crame sugod karong adlawa.

Sila maoy labing ulahi nga naapektahan sa nagpadayon nga paglahugay sa mga opisyal sa kapolisan sa tibuok nasud nga gipatuman ni PNP Chief Ronald Dela Rosa.

Si Sr. Supt. Renato Dugan, hepe sa Regional Personnel and Human Resource Development Division-7, nakadawat sa kamandoan gikan sa Camp Crame kagahapon lang gyud sa hapon.

Ang kamandoan gikan sa Camp Crame nagmando nga si Senior Superintendent Clifford Gairanod hulipan sa pagka direktor sa CPPO ug hulipan siya ni Senior Supt. Jose Macanas nga gikan sa Camp Crame.

Si Senior Supt. Benjamin Santos gipahulipan sa iyang puwesto pagka direktor sa Cebu City Police Office (CCPO) ug pulihan siya ni Senior Supt. Joel Doria.

Ang Camp Crame mitudlo usab ni Senior Supt. Rommel Cabagnot nga gikan sa Police Regional Office-8 isip bag-ong direktor sa Lapu-Lapu City Police Office. Ang gitudlong bag-ong direktor sa Mandaue City Police Office (MCPO) mao si Senior Supt. Roberto Alanas nga gikan sa National Capital Region Police Office.

Una nang girelibohan mao si Senior Supt. Dennis Agustin pagka direktor sa Bohol Provincial Police Office (BPPO) ug gitudlo nga bag-ong direktor mao si Senior Supt. Felipe Natividad nga gikan sa Highway Patrol Group sa Camp Crame.

Wala ilisi sa iyang puwesto si Sr. Supt. Erson Digal isip provincial police director sa Siquijor. Ang tanang mga opisyal nga gipangrelibohan gimandoan nga mo-report sa Personnel Holding and Accounting Unit sa Camp Crame.

Sayo ning semanaha, girelibohan usab sa katungdanan si Supt. Rex Derilo pagka hepe sa Regional Intelligence Division (RID) ug gibalhin isip hepe sa logistics division sa PRO-7.

Osmeña nasagmuyo

Si Mayor Tomas Osmeña wala gyud makagusto sa gihimo sa Camp Crame nga gipangrelibohan ang mga opisyal ug sakop sa kapolisan nga maayo’g agi sa kampanya batok sa ilegal nga drugas.

Wala pa hinoon mobutyag si Osmeña kun unsay sunod niyang lakang karon nga gitangtang gyud sa Camp Crame si Senior Supt. Santos isip direktor sa CCPO ug mitudlo og laing opisyal. Ang PNP Law naghatag og gahum sa mga mayor nga maoy mopili kun kinsa ang opisyal sa kapolisan nga itudlo nga police chief sa tagsa-tagsa nila ka dapit.

Ang lagda mao nga ang Camp Crame mosumiter ngadto sa mga mayor og lista sa labing menos lima ka ngalan sa opisyal nga papilian kanila. Si PRO-7 direktor Noli Taliño mibutyag nga ang pagrelibo sa mga opisyal sa kapolisan magpadayon bisan ang anaa sa mga lower units.

Wala makagusto si Mayor Osmeña sa pagrelibo sa tanang sakop sa Regional Special Operations Group (RSOG) ug Regional Anti-Illegal Drugs Special Operations Task Group nga aktibo kaayo sa kampanya batok sa gidiling drugas.

Ang maong grupo sa kapolisan maoy nakapatay sa giingong drug lord nga sila si Rowen Secretaria alyas Yawa ug ni Jeffrey Diaz alyas Jaguar. (BANAT NEWS)