Deposito sa private banks gikwestiyon sa COA

CEBU, Philippines - Gikwestiyon sa Commission on Audit ang pag-deposit sa Siyudad sa Sugbo og P381.4 milyones sa duha ka dili awtorisado nga pribadong bangko.

Matud ni COA Supervising Auditor Cymbeline Celia Uy nga ang maong pagdeposito wala gitugot sa guidelines sa Department of Finance.

Sa iyang Audit Observation Memorandum niadtong Mayo 26, 2016, gipahibawo ni Uy silang acting Mayor Margarita Osmeña, kanhi City Treasurer Diwa Cuevas ug kanhi City Accountant Mark Rossel Salomon nga ang mga local government units angay nga modeposito og public funds sa Government Financial Institution.

Nadawat kini ni Osmeña niadtong Hunyo 9 apan matud niya nga tubagon kini sa siyudad karong adlawa sa exit conference sa COA.

Nakita sa COA nga nideposito ang siyudad og P201.3 milyones ngadto sa Banco de Oro ug P180 milyones sa Veterans Bank nga dili awtorisado nga modawat og deposito sa mga public funds.

Ubos sa guidelines sa DOF, ang mga LGUs angay modeposito og kwarta sa mga GFIs nga dunay universal bank license.

Usa ang Land Bank of the Philippines sa mga awtorisadong bangko nga angay depositohan sa mga government funds. (BANAT NEWS)