Anak, dispatser gipang-gulgol

CEBU, Philippines - Gidakop ang usa ka amahan human gigulgol ang iyang anak alas 3 pasado sa hapon niadtong Domingo sa Brgy. Dagatan, Badian.

Ang gidakop mao si Glecerio “Gely” Antecristo, 68, residente sa maong lugar human sa iyang gihimo ngadto sa anak nga si Jonas “Jun” Antecristo, 36, kinsa nasamdan sa wala nga braso ug sa bukobuko.

Ang duha nag-inom sa wala pa ang hitabo. Dihang namauli, ang anak nangayo og kwarta sa inahan apan gibalibaran.

Tungod niini nanghagis ang biktima ug gihulga nga patyon ang inahan hinungdan nga nibarug ang amahan ug niduol sa anak ug naglalis.

Nikuha og sundang ang biktima ug tuyo nga gulgulon ang suspek apan nakalihay kini maong nasamdan siya sa walang bahin sa bukton. Nibalos ang suspek maong nasamdan ang biktima kinsa daling gidala sa tambalanan.

Sa laing bahin, usa ka dispatser ang gigulgol ug nasamdan sa liog sa iyang kauban nga dispatser kagahapon sa ala una sa hapon sa Sitio Balintawak, Kawit, Medellin human kini wala kadawat sa iyang bahin sa ilang kita.

Ang biktima nga si Negor Ramirez, 31, taga Purok Tomas, Kawit, ang nakagawas na sa tambalanan ug mopasaka og kaso batok sa suspek nga si Regalado Rosales, 42, taga Proper Kawit. (BANAT NEWS)