Late enrollees kutob Huwebes

CEBU, Philippines - Mohatag og lugway ang Department of Education (DepEd)-7 sa mga tinun-an nga wala pa makapa-enroll karong nagsugod na ang unang adlaw sa klase.

Nagkanayon ang Regional Information Officer sa DepEd-7 Amaryllis Villarmia, hatagan nila og lugway ang mga late enrollees hangtud sa Hunyo 17, adlaw’ng Biyernes.

Apan kun duna gyuy uban nga di pa gyud makapa-enroll sulod ning semana mahimo pa gihapon sila nga mag-enroll hangtud sa Hulyo apan hatagan og make-up activities aron dili mauwahi sa klase.

Gibutyag ni Dr. Marcial Degamo, Chief Education Program Supervisor sa DepEd-7 nga sa pagbukas sa klase ilang gilauman nga ang mo-enroll sa Junior High School naa sa 600 mil ngadto na sa 700 mil ka mga tinun-an gikan sa public schools.

Sa elementarya, moabot sa 1.1 million ang mga tinun-an, sa Kindergarten naa sa 200 mil ang mag-enrol ug sa Senior High School naa sa 84 mil ka mga estudyante.

Tungod karon sugdan ang Senior High School sa Grade 11 ang mga Senior High School Coordinators milibot aron sa pag-monitor sa maong bag-ong sistema.

Gipasabot ni Villarmia, ang DepEd Central Office mipagawas og Memorandum labot sa class activities sulod sa tulo ka semana diin duna silay daily log-in plan nga naay format nga ipanghatag sa mga magtutudlo kun unsay ilang buhaton sa unang tulo ka semana gikan pagsugod sa klase.

Sa Tisa I National High School , nagpadayon ang pagpanawat nila og mga late enrollees lakip na alang sa Senior High nga miabot na og 300 ka enrollees. Si Geromeo Misa, principal sa Tisa I National High School, niingon nga andam na sila sa K to12. Nakasabot siya nganong daghan gihapon ang nauwahi sa pag-enroll kagahapon tungod kay dugay ang pagproseso sa mga requirements sa mga estudyante.

 “On process na ang learning materials para sa mga estudyante ug ang mga different teachers sa Senior High nga niagi pa og training para ma-qualified to teach Senior High School kay andam na sad,” matud ni Misa. (BANAT NEWS)