Chiong, Señor nagkabangi
CEBU, Philippines - Gipahibawo ni Naga City Mayor Valdemar Chiong nga taud-taud na nga nibiya sa grupong Alayon ang dugay na niyang kauban nga si Bise Mayor Delfin Señor.
Si Chiong nikompirmar sa pagbiya ni Señor niadto pang Mayo 2 human sa ilang miting de avance sa wala pa ang piniliay.
Si Señor gikaingong nikuyog sa grupo ni Venci del Mar, kaatbang ni Mayor-elect Kristine Chiong, anak sa mayor.
Nakapangutana si Mayor Chiong nganong ingon ana ang desisyon ni Señor nga unta nananghid man siya niini kun gusto ba siya nga modagan sa pagkamayor apan nitubag nga wala siya nagtinguha sa maong posisyon hinungdan nga si Kristine ang nidagan.
Si Señor nidagan ug nidaug sa pagka-konsehal ug nihimakak nga nibali na siya sa laing partido.
“Wala ko nibiya. Ok ra ko. Wala koy problema ni mayor and yes I’m still with Alayon,” matud pa ni Señor.
Si Mayor Chiong niingon nga iya nang gipanglantawan daan nga si Señor motapon sa laing partido tungod kay nakadungog na siya sa mga bati nga pulong batok kaniya gikan sa nagkalain-laing tawo.
“Ang iyang gibuhat was really dishonorable. Unsaon nimo pagtawag ana nga ang tarp ni Kristine nga gidala sa ilang balay nga ang nawong sa poster giilisan,” dugang ni Mayor Chiong. (BANAT NEWS)
- Latest
