2 nalista sa ‘lambat sibat’ sikop

CEBU, Philippines - Nadakpan sa mga operatiba sa City Intelligence Branch (CIB) sa Cebu City Police Office ang duha ka lalaki nga anaa sa listahan sa Lambat Sibat sa mga nalambigit sa ilegal nga drugas atol sa buy-bust operation sa Barangay Apas pasado alas 7 sa nakalabay nga gabii.

Ang mga dinakpan giila nga sila si Virgilio Machang, ikaduha sa listahan nga gihulagway nga level 2 drug pusher ug Rommel Capuyan, 40, ika-unom sa listahan.

Sumala ni CIB deputy chief, Senior Insp. Rolito Supatan, nga ilang nadakpan ang duha nunot sa taho nga may mga nagsuyop sa likod sa karaang Regional Training School-7 sa Sitio San Miguel.

Nakuha sa mga polis gikan ni Machang ang unom ka gagmay nga pakete ug usa ka medium-size sa gituohang shabu samtang mga drug paraphernalia sab ang nakuha gikan ni Capuyan.

Si Capuyan nitug-an sa kapolisan nga gikan ni Machang ang shabu hinungdan nga ila kining gipalitan gamit ang P300 ug nasikop.

Si Machang niangkon sa pasangil apan niingon nga bag-o lang siya nibalik sa ilegal nga negosyo. (BANAT NEWS)