Operation Tok-Hang

CEBU, Philippines - Ang “Operation Tok-Hang” o “Tuktok Hangyo” sa mga ilegalista planohon una apan angayan nga hamagon na gyud ang mga dagkong target matud sa hepe sa kapolisan sa probinsiya nga si Senior Superintendent Clifford Gairano.

Matud ni Gairanod nga dili na unta kinahanglang hangyoon ug hamagon na lang diretso kadtong mga kriminal kay nahibalo man sila nga ilegal ug supak sa balaod ang ilang gibuhat. Sa sayo pa, ang incoming chief PNP nga si Chief Superintendent Ronald dela Rosa nagplano sa pag-implementar sa Tok-Hang ini’g lingkod na niya sa posisyon.

Ang Operation Tok-Hang i-implementar kini sa  barangay level aron mahunong ang operasyon tali sa mga pushers ug ilang supplier.

Sa habig sa kapolisan, si Gairanod miingon nga ilaha usab hingusgan ang paglimpiyo sa ilahang personnel sa habig sa probinsiya.

“We will not hesitate to shoot even the men in uniform, the men who have the same uniform with us if they are protecting illegal drugs or they are cuddling drug pushers and drug lords,” pasidaan ni Gairanod.

Matud ni Gairanod nga dili sila moimplementar og shoot to kill order apan kung ang mga ilegalista manukol di sila magpanuko pagpusil usab kanila.

“If they will try to encounter us, then we will give what they ask for….Unsaon nato paglimpiyo sa atong katilingban kung ang atong polis mga badlongon ug mga protector?,” ni Gairanod pa.

Si Gairanod nanawagan sa mga ilegalista nga mosurender na kini o mohunong sa ilang ilegal nga kalihukan lakip na sa iyang gipanawagan ang mga polis nga giingong nalambigit usab sa ilegal nga buhat.

“I am also urging the police, whoever still doing it to stop their illegal tradition of protecting and cuddling drug lords….they should stop or resign from the service, mag-drug lord na lang sila o mag-police ba sila,” panawagan usab ni Gairanod sa mga polis kinsa giingong nalambigit sa ilegal nga drugas.

Nunot niini, ang incoming nga presidente Rodrigo Duterte misaad nga mohatag og dakong reward sa makapatay og drug lord ug pusher.

Giklaro ni Gairanod nga wala sila mag-apas sa reward buot nilang motabang ug isip usa ka polis ilahang gipanumpaan ang pagprotekta sa katawhan ug pagsumpo sa ilegalista.

Gipasabot niya nga tumong usab nilang maprotektahan ang ugma sa kabataan ug sa mga mosunod pang henerasyon. Sa laing bahin usab, sukad niadtong Enero 9, 2016 pagpuli niya isip hepe sa kapolisan sa probinsiya sobra sa P45 milyones nga kantidad sa shabu na ang ilang nasakmit ug sobra sa 1,000 ka kaso ang napasaka nila ngadto sa korte. (BANAT NEWS)