3,000 polis sa victory party ni Digong
CEBU, Philippines - Kapin sa 3,000 ka polis ang gipakatap sa Police Regional Office-7 alang sa seguridad sa victory party ni President-elect Rodrigo Duterte sa Cebu Country Club kagabii.
Si PRO-7 Director Patrocinio Comendador niingon nga usa ka Task Force Pangulo ang gihulma nga mobantay sa kalihukan sa pagpakig-alayon sa Presidential Security Group.
Ang mga polis gikan sa PRO-7 Headquarters, Dakbayan sa Lapu-Lapu ug Mandaue ug Regional Public Safety Battalion.
Matud ni Comendador kinsa pangulo sa task force nga ang Highway Patrol Group ang gitahasan sa paghatag og seguridad kang Duterte sa paggawas niini gikan sa venue.
Ang kalihukan ang ikaduha nga victory party human niadtong Hunyo 1 sa Crocodile Park sa Davao City nga gikatahong gitambungan sa kapin 100,000 ka tawo.
Ang task force sa Davao nagpakatap usab mokabat sa 4,000 ka polis.
Gipaningkamutan sa kapolisan sa rehiyon 7 ang paghatag og hugot nga seguridad kang Duterte aron sama ka malampuson ang victory party sa Sugbo didto sa Davao City. (BANAT NEWS)
- Latest
