2 patay sa aksidente sa motor
CEBU, Philippines - Patay ang duha ug samdan ang tulo ka lalaki sa managlahing panagbangga sa mga sakyanan sa Brgy. Lugo, Borbon ug Sima, Dumanjug niadtong Lunes sa buntag.
Patay si Rowelito Catandihan Esver, 38, taga Lamac Campo, Don G. Antigua, human nabangga ang iyang motor sa laing motor nga gimaneho ni James Salogaol Montebon,19, taga Campusong, Borbon, kinsa may mga angkas nga sila si Jaco Orbase, 21, ug John Ray Labaho, 23, taga Lugo.
Base sa imbestigasyon ni PO2 Aristotle Mondelo nga usa sa niresponde, si Esver padulong sa trabaho dihang gikasugat sila si Montebon ug kaubanan gikan namista.
Giingong kusog ang dagan ni Montebon sa blind curve nga bahin ug wala nakabawi sa manobela ug nibangga ni Esver.
Gidala ang upat sa Juan Dosado Memorial Hospital apan gideklarar nga dead on arrival si Esver ug si Montebon gitambalan sa naangkon nga bali sa wala nga tiil ug mga pangos sa iyang mga angkas.
Matud ni Mondelo nga sila si Montebon ug kauban nakainom gamay og bino gikan namista samtang accident prone area usab ang nahitaboan.
Ang asawa sa namatay dili na mopasaka og kaso sanglit nagkasabot sila nga magpabayad na lang.
Patay usab si Consorcia Magdasal human nabanggaan og motor dihang nilabang sa karsada sa Sima, Dumanjug.
Ang drayber sa motor naila nga si Marvin Calago, taga Sta. Cruz, Ronda.
Ang biktima ug ang nakabangga gidala sa Barili District Hospital apan gideklarar nga dead on arrival si Magdasal samtang nagpabilin sa tambalanan si Calago kinsa nakaangkon lang og pangos sa lawas.
Wala pay gipasaka nga kaso ang tagtungod ni Magdasal. (BANAT NEWS)
- Latest
