11 dakpan, P.9M shabu nasakmit

CEBU, Philippines - Onse ka mga tawo ang nadakpan ug usa nila ang napusilan sa mga sakop sa Provincial Intelligence Branch (PIB) sa Cebu Provincial Police Office atol sa pagpang ronda nga ilang gihimo diha sa Brgy. Gairan, Dakbayan sa Bogo sa nakalabay nga gabii.

Halos usa ka milyon nga kantidad sa gituohang shabu ang nasakmit sa kapulisan ug usa ka drug den sa sementeryo ang natultolan sa mga polis.

Target sa kapulisan ang maglive-in partner nga sila si Emmanuel “Manuel” Berengeraka ug Emelita Orbita nga nagpuyo sa maong dapit.

Ang mga dinakpan giila nga sila si Emelita, Roxane Sio, Randy Malacaman, Thany Ancajas, Amed Cadlawon, Janray Ople, Marjun Niez, Jericho Sevilla, Romel Toring, Aljon Buenconejo.

Samtang ang napusilan sa mga polis si Rico Monterde, apan atol sa maong operasyon nakasibat si Berengeraka human usa sa iyang mga kaliwat ang mibabag sa kapulisan.

Ang team leader sa PIB nga si Senior Police Officer 1 Reynaldo Solante nga nahinabi sa Banat News nagkanayon nga pulos mga level 2 drug pusher sila si Manuel ug Emelita.

Sumala pa ni Solante nga sa dihang ilang gihamagan ang gipuy-an sa duha miharang sa mga polis si Monterde hinungdan nga napusilan kini sa tiil.

Sa dihang nakabantay si Manuel misutoy kini og dagan hangtod nahitabo ang ginukoray padung sa sam-ang ug didto na kini nahanaw, apan natultolan hinuon sa mga polis ang usa ka drug den ug didto nadakpan ang ubang mga dinakpan.

Narekober sa mga polis gikan sa mga dinakpan ang mga drug paraphernalia ug shabu nga mikantidad og P 944 mil. Nakuha usab sa mga polis gikan ni Rico ang usa ka .45 caliber pistol.

Si Solante mipasabot nga makalima na ka higayon nga sulay nila nga gironda ang managkapuyo apan pirmi silang makaikyas kay giingong adunay duha ka sakop sa Bogo City Police nga nagprotektar kanila.

Sigun pa ni Solante nga duna na sila’y pangalan sa usa sa mga polis ug ang kauban niini ilaha pa nga gisubay, apan matud pa pulos pa sila mga bagito.

Gipasabot ni Solante nga niadtong nakalabay nga semana maoy pinaka ulahi nga sulay unta sila nga mihimo og operasyon apan napalpak.

Niadtong nakalabay nga gabie nadayon ra gayod sa taga PIB ang ilang plano human mismo ang hepe sa kapulisan sa Bogo City ang miingon sa taga PIB nga dili na lang ipahibalo sa kapulisan sa Bogo nga adunay operasyon ang PIB.

“Akoy nalooy anang hepe sa Bogo kay naningkamot gyod intawon na nga makuha nang mga drug pusher sa area niya, unya naa diay mga traydor sa iyang mga sakop,” sigun pa ni Solante.

Usa usab sa gikabalak-an ni Solante ang seguridad sa ilang grupo kung mohimo sila og pagpangronda kay mahibalo na man daan ang ilang target.

“Ang safety namo, apil pud na. Mga bag-o pa sa serbisyo ning usa, naa na mi ngalan, angayan lang nga maundang ni sila kay maglibog ning mga tawo kung asa motuo,” sumala pa ni Solante.

Hinuon nagpasalamat si Solante  sa suporta sa kagamhanang lokal sa dakbayan sa Bogo human mismo si Mayor Celestino “Junnie” Martinez Sr. ang usa sa mga witness sa gihimong imbentaryo sa mga nakuha nga mga ebidensya.

Samtang P100 mil nga shabu ang nasakmit gikan sa duha ka gipasanginlang  drug pushers sa Sitio Tabok Lamac, Brgy. Yati, Lungsod sa Liloan.

Ang mga nadakpan mao sila si Donald Pallermo Tulo Jr. 30, ug Jomar Udtohan  Daviola, 29, pulos nagpuyo sa maong lugar. (BANAT NEWS)