P98M patubig sa Alegria sugdan na
CEBU, Philippines - Sugdan na ang Alegria Integrated Potable Water Supply Project sa Lungsod sa Alegria sa kantidad nga P98 milyones.
Si Provincial Agriculturist Roldan Saragena nagkanayon nga nakadawat sila og No Objection Letter-1 aron masugdan na ang sub-project sa probinsiya ubos sa Philippine Rural Development Project (PRDP).
Gipasabot ni Saragena nga sa pag-isyu sa NOL-1, ang probinsiya mobukas kini og account alang sa 10 porsyento nga counterpart sa sub-project ug dayon isunod ang public bidding.
Mokabat sa 3,877 ka kabalayan sa walo sa siyam ka barangay sa Alegria ang makabenepisyo sa proyekto.
Kini mao ang Montpeller, Guadalupe, Madridejos, Poblacion, Valencia, Compostela, Sta. Filomena ug Legaspi.
Matud ni Saragena nga ang National Project Coordination Office sa PRDP niisyu og NOL.
Human sa bidding, ang NPCO nga ubos sa Department of Agriculture moisyu og NOL-2 aron masugdan ang awarding sa kontrata.
Base sa sub-project database sa PRDP niadtong Mayo 13, 2016, ang Regional Project Advisory Board (RPAB) niaprobar sa tulo pa ka mga proyekto nga giduso sa PRDP-Cebu Provincial Project Management and Implementing Unit.
Kini mao ang rehabilitation sa 7.8-kilometer nga Looc-Talisay farm-to-market road sa Santander; 15.5-kilometer nga MacArthur-Buenavista farm-to-market road sa Tudela, Isla sa Camotes ug 25-kilometer sa Nahus-an ngadto sa Poblacion farm-to-market road sa Sogod.
Ang laing sub-project nga rehabilitation sa 6.58-kilometer nga Agujo-Tapilon farm-to-market road sa Daanbantayan andam na kining i-endorso alang sa NOL-1.
Gawas niini, walo usab ka road rehabilitation sub-projects nga dunay gitas-on nga 76.15-kilometers ang ubos sa feasibility study ug laing unom ka farm-to-market roads ang ubos sa validation. (BANAT NEWS)
- Latest
