Canyoneering sa Alegria gisuspenso
CEBU, Philippines – Ang kagamhanan sa probinsiya mipasuspenso sa ‘canyoneering’ sa lungsod sa Alegria tungod sa mga aksidente kay giingong wala motuman sa mga precautionary measure ang mga tour guides.
Si Bise Gobernador Agnes Magpale, chairman sa provincial tourism nagkanayon nga mirekomendar sila ni Gob. Hilario Davide III nga isuspenso lang una ang canyoneering sulod sa usa ka buwan. Matud pa adunay mga nadisgrasya sa lugar, tulo niini niadtong buwan sa Marso ug usa sa milabay’ng semana ug wala kini i-report diha sa ilang buhatan.
Ang hepe sa Provincial Disaster Risk Reduction Management Office (PDRRMO) gimandoan sa gobernador nga mogama og kaugalingong assessment.
Si Tribunalo mirekomendar nga isuspenso sulod sa duha ka buwan ang canyoneering aron mahuman ang mga angayan nilang buhaton. Naghuwat pa sila sa pagbalik ni Davide aron mogama og ordinansa diin malakip niini nga ang matag usa ka tour guide duha lang ka turista ang iyang atimanon.
Matud ni Magpale nga “high risk tourism” ang canyoneering ug daghan kaayo ang mobisita sa lugar. Giingong matag weekend moabot ngadto sa 1,000 ka turista ang mobisita sa lugar aron mag-canyoneering ug dili pa gyud andam ang probinsiya niini kay ang mga tour guides kuwang usab og dugang training.
Ang lungsod dako og makuha niining abot tungod kay matag usa ka tawo mobayad og P2,500 alang sa canyoneering.
Ang lungsod sa Badian maoy agianan paingon ngadto sa canyoneering site sa Alegria.
Matud usab ni Magpale nga kinahanglan nga ang mga opisyal sa Alegria ug Badian magsabot. - /EIM) (BANAT NEWS)
- Latest
