CAIDSOTG gigantihan ni Osmeña

CEBU, Philippines - Personal nga gitunol ni incoming mayor Tomas Osmeña ang P50 mil nga reward ngadto sa sakop sa City Anti-Illegal Drugs Special Operations Task Group (CAIDSOTG) kagahapon didto sa iyang panimalay sa Guadalupe.

Kini human nila mapatay ang usa ka gipasanginlang drug pusher sa nahitabong shootout pasado alas-2 sa kaadlawon niadtong Huwebes, Mayo 19, diha sa Brgy. Sudlon 2 ning dakbayan.

Si Osmeña miangkon nga dili gayud mawagtang ang drugas apan misaad siya nga iya kining paminusan.

Mibutyag si Osmeña nga dili lamang drug lords ang ilang gitutokan karon, hasta ang mga polis  nga nalambigit sa maong ilegal nga binuhatan.

“I don’t have a list but we know more or less some numbers but we don’t have to announce this. So this warning enclosed not only to the drug lords but also to the policemen who are involved,” matud ni Osmeña.

Lakip sa gipasalig si Osmeña ang rekomendaasyon ngadto sa Philippine National Police kung makapatay ang kapolisan og drug lord. Gusto usab ni Osmeña nga mopaubos og retraining ang mga kapolisan sa dakbayan aron sila makaigo dili lamang sa paa o sa bukton apan diretso sa mata.

Gusto ni Osmeña nga ipakita sa mga tawo hilabi na sa mga kababayen-an nga dili delikado nga maglakaw sa kadalanan o ang magsakay sa mga jeep, iyang gipasalig nga dili siya kinahanglang molapas sa balaod paghimo niini.

“Who’s going to defend you the Commission on Human Rights? No way, I’m here to protect you, sure I’m following the law, there’s no problem, I’m pushing the envelope, that’s the expression that I’m really pushing up the boundaries what’s legal and not,” dugang ni Osmeña.

Si Senior Inspector Eunil Avergonzado, hepe sa CAIDSOTG, mapasalamaton sa ilang nadawat nga reward gikan kang Osmeña apan iyang giklaro nga naghimo ra sila sa ilang trabaho.

Matud ni Avergonzado  nga ang P25 mil nga katunga sa ilang nadawat ipalit nila og high definition nga mga flashlights para sa ilang night operation ug dugang nga bala ug posas.

Ang laing P25 mil idonar nila ngadto sa kapilya sa San Vicente Ferrer sa Lungsod sa San Fernando nga nasunog niadtong Mayo 3 sanglit sagad sa iyang sakop deboto sa maong santos. (BANAT NEWS)