Drayber nga apektado sa BRT tabangan

CEBU, Philippines - Gipasalig ni Cebu City mayor-elect Tomas Osmeña nga hatagan niya og lain nga panginabuhian ang mga drayber sa PUJ nga maapektohan sa pag-implimentar nga Bus Rapid Transit dinhi sa dakbayan sa Sugbo.

Si Osmeña miingon nga adunay alternatibo nga trabaho nga iyang itanyag ngadto sa mga drayber, apan dili hinoon silang tanan ang makapahimulos        niini. Ang Cebu City Transportation Office mipresentar og duha ka alternatibong trabaho. Kini mao ang pagtrabaho sa mga drayber ngadto sa BRT ug ang ikaduha mao ang pagpasulod og trabaho sa construction.

Ang Technical Education and Skills Development Authority (TESDA) nakig-alayon na sa Department of Transportation and Communications ug kagamhanan sa dakbayan sa Sugbo alang sa training ug pagpaeskwela sa mga drayber nga mobiya na sa sector sa transportasyon.

Samtang, si Gregory Perez sa Pinagkaisang Samahan ng mga Tsuper at Operators Nationwide (PISTON) nagkanayon nga lig-on ang ilang baruganan nga supak sila sa pagpatuman sa BRT kay daghan sa mga drayber ang mawagtangan og panginabuhian.

Matud ni Perez nga dili lang sila nga mga drayber ang maapektohan, apan lakip na usab ang mga tindera nga anaa daplin sa kadalanan.

Miklaro si Perez nga hangtod karon wala pa gihapo’y nahatag nga listahan ang Land Transportation Franchising and Regulatory Board ngadto kanila aron ilang masuta kun unsa nga mga franchise sa PUJ ang labing maapektohan.

Gusto ni Perez nga kun mahinayon na gayud ang BRT dinhi sa dakbayan, hatagan og alternatibong panginabuhian ang tanang apektadong drayber.

Si Perez midugang nga magpahigayon sila og petisyon kabahin niini ug nga magprotesta unya sila sa kadalanan.

Pagka karon, adunay 2,000 ka PUJ driver ang Sugbo ug mga 1,300 kanila ang maapektohan sa Phase 1 sa BRT nga gitakdang sugdan sa hinapos niining tuiga.

Ang BRT magsubay sa rota gikan sa Bulacao ngadto sa Ayala ug diritso na sa Talamban. (BANAT NEWS)