Usa sa suspek sa CV robberies sikop

CEBU, Philippines - Nadakpan sa kapulisan ang giingong Most Wanted Person sa Central Visayas nga nalambigit sa dagkong mga kaso sa pagpanulis sa Kabisay-an didto sa Purok 3, Brgy. Robocon sa lungsod sa Linamon, Lanao del Norte sa miaging gabii.

Ang mga sakop sa Special Action Force (SAF), Regional Special Operation Group (RSOG), Regional Intelligence Division (RID), ug mga kapulisan sa Linamon Lanao del Norte misikop kang Michael Sauna Florida alyas Lingo-lingo, 33.

Ang operasyon gipangulohan sa hepe sa RSOG-7 Superintendent Rex Derilo kauban si Supt. George Ylanan sa pagsikop sa suspek.

Nakuha gikan sa suspek ang usa ka Remington.45 caliber pistol ug mga magazines ug bala niini.

Si Florida usa sa gitumbok nga suspek sa mga sagunson nga pagpanulis  dinhi sa Central Visayas ilabi na sa Metro Cebu.

Suspek siya niadtong Marso 21, 2015 sa E-Bingo Boutique sa Parkmall, Tipolo ug City Time Square sa Dakbayan sa Mandaue, apil sab ang E-Bingo Boutique sa Brgy. Bagacay, Dumaguete City.

Usa usab siya sa suspek sa pagpanulis sa myGold Pawnshop niadtong Abril 25, 2015 sa dalan Colon sa Dakbayan sa Sugbo ug Oro China Pawnshop sa City Time Square Commercial Center Tagbilaran City.

Matud pa ni Derilo natultolan si Florida base sa impormasyong ilang nakuha sa kauban niini nga nasikop.

Si Florida nga nakahinabi sa Banat News ug miangkon sa pagpanulis sa myGold diin siya nakuhaan og footage apan wala na siya nihatag og dugang impormasyon sa ubang  mga pagpanulis .

Ang Vice President for Security sa Gaisano Group of Company Metro nga si Retired Lieutenant General Roy V. Kyamko nihangop sa pagkasikop sa suspek.

Sa pagkakaron adunay upat ka managlahing warrants of arrest for Robbery with Violence didto sa Bohol Regional Trial Court (RTC) Branch 47, Negros Oriental RTC Branch 41, Cebu City RTC Branch 10 ug Ozamiz City RTC Branch 15 ang giatubang ni Florida. (BANAT NEWS)