Nakuryoso kun grounded ang poste namatay

CEBU, Philippines - Mipilit sa poste sa CEBECO ug namatay ang usa ka 34 anyos nga lalaki human mikatkat kay gusto niya nga subayon kung tinuod ba nga grounded ang maong poste diha sa Sitio Colonia, Brgy. Ilihan sa Lungsod sa Tabogon pasado alas-4 sa nakalabay nga hapon.

Ang nakuryentehan patay giila nga si Roldan Echavez, taga Brgy. Tabionan, sa San Fernando ug nagtrabaho sa usa ka poultry farm sa maong lungsod.

Matud pa ni Police Officer 3 Steve Booc, imbestigador sa Tabogon Police Station nga nahinabi sa Banat News ang manghod sa namatay nga si Reynaldo miingon nga igo lang nanguryoso ang  maguwang human gisultihan sa iyang kauban nga grounded ang maong poste.

Apan kalit mikatkat si Roldan sa poste ug pag-abot niini sa taas didto na kini mipilit human nakuryentihan. Natangtang lang  kini sa poste human gipalong ang linya sa maong poste.

Sumala pa natagak kini sa yuta ug nabantayan nga nagginhawa pa maong gidala kini sa tambalanan sa lungsod sa Sogod apan didto gideklarar kini nga dead on arrival. (BANAT NEWS)