Lima ka adlaw na nga naghuot ang traffic sa duha ka taytayan

CEBU, Philippines - Planong ablihan sa Dakbayan sa Lapu-Lapu ang usa ka dalan sa Maximo V. Patalinjug sa habig sa Brgy. Pajo alang sa pagsulbad sa bug-at nga dagan sa trapiko sa may Mandaue-Mactan Bridge sugod sa miaging Sabado.

Nagkanayon si Frank Brazil, hepe sa City Traffic Management Systems nga ilahang ablihan ang dalan gikan sa Marigondon padulong sa Basak (Tamiya) nga modiretso sa karaang taytayan.

Matud ni Brazil, mga motorista gikan sa merkado sa siyudad dili makaliko dayon sa taytayan ug kinahanglan mo-right turn sa Pajo aron makagawas sa siyudad.

Base sa diskusyon ni Brazil ug Architect Florentino Nimor, pangulo sa City Planning Development Office ug executive chief sa Traffic Enforcement Agency of Mandaue kagahapon sa hapon, walay giusab nga rota gikan sa Manuel L. Quezon Highway sa siyudad sa Lapu-Lapu.

Sumala pa ni Brazil, nakapasamot sad sa trapiko sa karaang taytayan ang expansion joint niini human gitangtangan sa kontraktor sa Department of Public Works and Highways ang aspalto, hinungdan nga hinay ang pasaka sa mga sakyanan.

Gipaabot na kini ngadto sa DPWH ug misugyot sila pabutangan og rampa aron dili maglisud og saka ang mga sakyanan sa maong taytayan.

Gawas sa karaang taytayan,nasinati usab ang trapik sa Marcelo Fernan Bridge tungod kay ang traffic light sa may U.N Avenue eskina sa D.M Cortes (kanhi Plaridel) ang nakaingon sa maong sitwasyon.

Matud pang Nimor, ilang i-adjust ang oras sa traffic lights sa pagdagan sa mga sakyanan apan kinahanglan unang makahibawo ang DPWH sa maong lakang. "Both LGU's cannot decide if there's no (presence) of DPWH," matud ni Nimor. Gisugyot usab nga i-extend ang pag-abli sa karaang taytayan gikan sa alas-9 sa gabii hangtud alas-12 sa tungang gabii.

Si Brazil sa iyang bahin miingon nga iyaha kining ipaabot kang Mayor Paz Radaza ang planong pag-abli sa usa ka bahin nga lane sa MVP.

Gipasalig ni Brazil nga adunay mga i-deploy nga mga CTMS traffic personnel ubos sa duha ka taytayan alang sa pagkontrolar sa dagan sa trapiko kung madayon ang maong plano. (BANAT NEWS)