P50mil kada drug lord ug kriminal nga mapatay

CEBU, Philippines - Ipadayon ni mayor-elect Tomas Osmeña ang iyang gisaad nga mohatag og reward nga P50 mil ngadto sa mga pulis nga makapatay og drug lord ug mga kriminal.

Nagpabilin nga lig-on ang baruganan ni Osmeña sa pag-ingon sa mga pulis nga pusilon ug patyon ang mga kriminal basta legal lamang kini.

Matud ni Osmeña nga sagad sa mga tawo karon dili na mahadlok og pulis hinungdan nga gusto niya kining usbon sa iyang paglingkod.

Siya miingon nga kinahanglan nga ibalik ang kaniadto diin ang mga tawo adunay kahadlok ug respeto sa balaod.

Mipasabot si Osmeña nga dili lamang ang mga drug lords apan apil na usab ang mga kriminal nga nakapasar sa gitawag niya nga “criteria.”

Matud niya nga ang dakbayan usa sa adunay pinakataas nga murder rate sa Pilipinas ug gusto niya nga maminosan kini. “That’s the only thing that lessens crimes. Do you think that if you tell the people please do not commit the crime, do you think they will stop?,” dugang ni Osmeña.

 Giklaro ni Osmeña nga dili kini supak sa simbahan sanglit siya prolife. Matud niya nga ang mga krimen gihimo ra sa susamang mga kriminal ug dili buot pasabot nga daghang mga tawo ang kriminal.

Gusto niya nga kung adunay motawag sa Mobile Patrol, kinahanglan dayon nga respondehan bisan pa man og unsa ang rason niini.

Sa laing bahin, miingon si Osmeña nga pabor siya nga armasan ang mga tanod apan kinahanglan nga moagi kini og sakto nga training. (BANAT NEWS)